Nunatsinni imminut toqunnissamik pinaveersaartitsineq pillugu ilisimatuussutsikkut suliniut pingaarutilik Royal Arctic Linep tapersersorpaa

Suliniutigineqartoq imminut toqunnissamik pinaveersaartitsineq pillugu ilisimasat nunatsinni nunaqarfinni tamani innuttaasunut avitseqatigiissutiginissaannut aammalu Nunatsinni imminut toquttarnerup qanoq iliorluni pinngitsoortinnissaanut innuttaasut ilisimasaannik ilanngussinissamut tapertaassaaq. Royal Arctic Linep tapersersuilluni aningaasaliissuteqartarnermut ataatsimiititaliaa isumaqarpoq ilisimasat katersorneqartut pingaaruteqarluinnartut, aammalu upperalugu inuiaqatigiinnut kalaallinut tamanut siunissamilu kinguaariinnut takkuttussanut iluaqutaajumaartut.

”Royal Arctic Line inuiaqatigiinnut akisussaaqataavoq kinguaariillu takkuttussat innuttaasullu - nunatsinni pisuussutitta pingaarnersaat - salliutinneqarnissaat kissaatigalugu. Ilinniartitaanikkut periarfissat eqeersimaartumik tapersersorusuppagut Nunatsinnilu ilaqutariit nukittorsarneqarnissaat aamma suleqataaffigerusullugu.
Imminut toquttoqarneranik qanimut misigisaqarsimasugut amerlavugut, taamaattumillu suliniutip matuma tapersersornissaa Tapersersuilluni aningaasaliissuteqartarnermut ataatsimiititaliamut pissusissamisoorpoq. Ilisimatusarnikkut ilisimasanik pingaarutilinnik katersisoqassaaq, taakkulu Nunatsinni imminut toquttarneq pillugu kisitsisit ikilisarnissaannut aalajangiisuusinnaapput. Innuttaasunut tamanut iluaqutaassaaq, aamma allanut kaammattuutigerusupparput ilisimatuussutsikkut suliniut manna, ilisimatusartunit tarnillu pissusianik ilisimasalinnit maaniumiunit ingerlanneqartoq tapersersoqqullugu,” attaveqaqatigiinnermut nittarsaassinermullu pisortaq, Ann-Britta Olsvig, Royal Arctic Linemi tapersersuilluni aningaasaliissuteqartarnermut ataatsimiititaliaq sinnerlugu taama oqarpoq.

Ilisimatusartup Arnârak Patricia Blochip Royal Arctic Linep tapersersuinera qujamasuutigaa:

”Royal Arctic Linep tapersersuinera nuannaarutigeqaara. Peqqissuseq pillugu ilisimasanik pissarsisinnaaneq inuttut pisinnaatitaaffiuvoq, tassunga ilanngullugit imminut toqunnissamik pinaveersaartitsineq pillugu ilisimasat. Aamma inuttut pisinnaatitaaffiuvoq oqaatsit ilitsoqqussat atorlugit nammineq peqqissusermut suut iluaqutaasinnaanerannik paasissutissanik pissarsisinnaanissaq. Taamaattumik MPF ilaqutariinnut tarnikkut ikiorsiinermik ilinniagallip aammalu tarnikkut nappaatilinnut peqqissaasup kalaallip Henriette Berthelsenip aamma tarnip pissusianik ilisimasallip kalaallip Vilhelm Berthelsenip suleqatiginissaannik isumaqatigiissuteqarfiginerat pingaaruteqarluinnarpoq, taakku suliniummik ingerlatseqatigissagakkit. Suliniummut missingersuutit killeqarput, taamaattumik Royal Arctic Linep 130.000 koruuninik tapiissuteqarnermi saniatigut umiarsuaatiminik angallassinissaminik aamma tapersersuinera nuannaarutigeqaarput. Pinaveersaartitsinerup sunniuteqarnissaanut inuiaqatigiit tamarmiullutik imminut toqunnissamik pinaveersaartitsinermut kivitseqataanerannut assersuutissaavoq, Royal Arctic Linelu uummammit pisumik qujaffigerusuppara soqutiginninneranut tapersersuineranullu. Taamaaliornikkut nunaqarfinni innuttaasut isumaat sulinermi ilanngunneqarsinnaapput, Nunatsinni imminut toqunnissamik pinaveersaartitsinermik suliaqarnermi aalajangeeqataasinnaanissaat anguniarlugu.”

Royal Arctic Line ilisimatuussutsikkut suliniummut tapersersuilluni 130.000 koruuninik aningaasaliivoq aammalu ilisimatusartut nunaqarfinnut tikitassaminnut ajornannginnerusumik angalasinnaanissaannut nunaqarfiliartaatiminik atugassillugit.

Ikiortariaqarpit?
Imminut toqunnissamik eqqarsaateqaruit imaluunniit kiserlioruit taava Tusaanngamut ulloq unnuarlu attaveqarsinnaavutit oqarasuaatikkut
80 11 80-imut imaluunniit 18 99-imut sms-erlutit.
Oqaloqateqarneq akeqanngilaq kinaassutsillu isertuunneqassaaq.