Royal Arctic Linep ataatsimeersuarnera 2023
Royal Arctic Linep ingerlaarfigisartakkanik umiarsualivinnillu allanngortiterinera 2022-mi naammassineqarpoq
Ingerlaarfigisartakkanik umiarsualivinnillu allanngortiterinerup naammassineqarneratigut 2022 tassaavoq ukioq qangatut assartuusseriaaseqarluni angalaffiusoq kingulleq taamatullu aamma Danmarkimi marloqiusamik ingerlatsiffiusoq. Aningaasaqarnikkut angusaq tassaavoq akileraannginnermi 96 millioninik amigartooruteqarneq 56-66 millioninik amigartoorneqarnissaq naatsorsuutigineqaqqaarsimagaluarluni.
Royal Arctic Linep Aarhusip Umiarsualivianut nuunnissaq decembarip 31-ani pisussaagaluartoq juunip qiteqqunneranut siuartippaa allanngortiterinermi alloriarnerni kingullerni pilersuinerup isumannaatsuunissaa illersorumallugu. Ukiup affaani kingullermi marloqiusamik ingerlatsineq 30-35 millionit missaannik aningaasartuuteqarnerunermut pissutaaqataavoq. Allanngortitsisoqarneratalu pilersuinermut sunniuteqannginnera eqqarsaatigalugu 2022-mut angusat naammagisimaarnartutut nalilerneqarput.
Imaatigut assartuussinerup siunissamut qulakkeerneqarnera umiarsuarnullu nutaanut 1,2 milliardinik aningaasalersuisoqarnera piffissami 2015-imit 2022-mut umiarsuaatileqatigiiffimmut akinik allannguiffiunngitsumik ingerlanneqarpoq. Ingerlatseqatigiiffiullu taamaalilluni allanngortitsineq nammineerluni aningaasalersorpaa, ukiunili kingullerni arfineq marlunni assartukkat annertussusiisa qaffakkiartornerat aamma iluaqutigilluarsimallugu.
”Taama angusaqarnitsinni imaatigut assartuussinermi 1972-ip kingorna allannguinerit annersaata ingerlanneqarnerani pilersuinerup pinngitsoorani illersorneqartariaqarnera isiginiarneqassaaq. Allanngortiterineq maanna naammassereerpoq ulluinnarnilu ingerlatsinerput pingaarnertullu suliassarput kingumut ukkatareqqissinnaanngorpagut”, Royal Arctic Linemi pisortaaneq Verner Hammeken taama oqarpoq. ”Inuiaat kalaallit piginnittorivagut innuttaasullu sullitaralugit. Innuttaasunut aningaasartuutaasoq inuiaqatigiinnut tamanut pingaaruteqartupilussuuvoq. Taamaammat aamma akinik qaffaanani allanngortiterinerup ingerlanneqarnissaa pingaartissimavarput. Uatsinnullu tunngatillugu nammineerluta pigisatsinni aningaasassarsiortariaqarsimavarput, aammalumi taamaaliorpugut”.
Aningaasaqarnermut pisortaq Jørgen Aqe Møller ima oqarpoq: ”2022 imaannaanngitsoq qaangiutereersoq 2023-mi aallartilluarsimanerput takusinnaallugu pitsaavoq. Kvartalip siulliup kingorna 2023-mut angusassatut naatsorsuutigisatsinnut ingerlaarnitsinnut pitsaasunik takussutissaqarpoq. 2023-mi angusanik pitsaasunik saqqummiussaqarsinnaanissarput erseqqissumik anguniagaraarput. Tamannalu pissaaq sorpassuartigut aningaasartuutit qaffakkiartoraluartut kiisalu nunarsuarmi eqqissiviilliortoqarnera akillu ineriartornerat pillugu suli nalorninartoqaraluartoq”.
Royal Arctic Line 731-nik sulisoqarpoq ilinniartut 33-t ilanngullugit, Danmarkimi umiarsualiveqarnermi ingerlatat atorunnaarsinnerisa kingorna sulisut 87-it suliunnaarsinneqarnerisa kingorna. Royal Arctic Line Nunatsinnut imaatigut assartuussinermi kisermaassisussaatitaavoq. Nunatsinnut, nunatsinnit nunarpullu tamakkerlugu nioqqutinik assigiinngitsunik assartuinermut kisermaassisussaatitaavoq, sumiiffiillu qanoq akulikitsigisumik tikinneqartarnissaat akigititallu naalakkersuinikkut aalajangerneqartarput. Nunatsinnut nunattalu iluani akit ukiuni kingullerni arfineq pingasuni naleqqussarneqarsimanngillat, tamannalu sanaartornermut atuinermullu aningaasatigut atugassarititaasut patajaatsumiitinneqarnerinut pissutaaqataavoq. Nunatta avataanut assartukkanut akitigut akikillisaataasoq 2023-mi februaarip qaammataani annikillisinneqarpoq. Umiarsuaatileqatigiiffiup iluatsitsilluarnissaanut tunngavissat tassaapput Nunatsinnut, nunatsinnit nunattalu iluani pilersuinerup qulakkeerneqarnissaa Nunatta nunanik allanik niueqateqarsinnaaneranik nukittorsaajuarnikkut. Suliassarlu naammassineqassaaq aningaasaqarnikkut pisussaaffiliunneqartut kiisalu piujuartitsinermut tunngatillugu aaqqiissutissat piumaneqaleriartuinnartut eqquutsinneqarnerisigut, tassunga ilanngullugit avatangiisinut, inooqataanermut aqutsinikkullu ineriartortitsinermut pitsaasumik tunniusseqataanikkut.