Nunarput suli unammillersinnaassuseqarpoq aamma Canadamiut aalisariutaat suli tikilluaqqusaapput

Februaarip aallartilaarnerani Royal Arctic Linep assartuussinermut akinut malittarisassat nutaat avammut assartuussinermut akit qaffariaateqarnerinik kinguneqartut saqqummiuppai. Nunatsinnut aammalu Nunatta iluani assartuussinerit ukiut arfineq-pingajussaanni ingerlanneqartumi allannguuteqarsimanngillat. Containerit kissassutsimikkut/nillissutsimikkut aalajangersimasumiittussat Nunatsinniit nassiunneqartut tikisinniakkap akiata affaanik akeqartinneqaannassaaq.

Sermitsiaq.AG-p sap. akunnerani matumani allaaseraa Canadamiut aalisariutaasa Nunatsinniit avammut nassiussinermi akit qaffannerat peqqutigalugu nunatsinni tulaassisarnertik ingerlatiinnassanerlugu isumaliutigigaat.

Niuernikkut eqqarsarluni isumaliornermi ilaatinneqassapput tulaassisinnaanissamut periarfissarititat allat atussagaanni kingunerisassai (assersuutigalugu St. John’simi 900 sømilit sinnerlugit Nuummiit ungasissusilimmiittumi), piffissaq angalanermut atugassaq (Nuummiit ullut pingasut sisamallu akornanni ass. St. John’simut aammalu ullut taakkua aalisanngitsoorfiusussat), kiisalu orsussamut assartuinissamullu, ass. Saint John’simi aningaasartuutissat.

Taamaattumik Royal Arctic Linep naatsorsuutiginngilaa Canadamiut aalisariutaasa Nunatsinni tulaassisarunnaarnissaat, namminneerlutilli nalilersuutit qulaani tunngavilersuutaasut malillugit nalililiissapput. Matumani Royal Arctic Linep suliassarivaa niuernikkut illersorsinnaasumik ingerlatsinissaq atuisullu kiffartuunneqarnermut atuuttumut akiliuteqarnissaat, tamannaavorlu allannguutaasoq.

Avammut assartuinermut akigititap sipaarutissartaa allatut nalimmassarneqaqqissinnaagaluarpoq Nunatsinni atuisuusut matussusiisussanngortinneqarlutik taamaasillutik Canadamiut aalisariutaat Nunatsinni tulaasseriarlutik akikitsumik assartugassat apuuffissaannut assartorsinnaallugit.