Umiarsuaq containerilersuut nutaaq Tunup Islandillu akornanni angalassaaq

Umiarsuarmik containerilersuummik nutaamik Tunumik pilersuisussamik pisinissaq pillugu isumaqatigiissut Royal Arctic Linep tallimanngornermi decembarip 20-ani 2019-imi atsiorpaa.

Umiarsuaq nutaaq containerinik 108-nik usisinnaavoq 2020-milu apriilip qaammataani tiguneqarnissaa naatsorsuutigineqarpoq.

Umiarsuaq pisiarineqartoq pingaartumik Reykjavikip Tasiilallu akornanni angalatinneqassaaq, Tunullu umiarsuaqarnera taamaalilluni malunnaatilimmik pitsanngoriaateqassalluni, akulikinnerusumik tikinneqartalernissaanut nunarsuullu sinneranut attaveqalerneranut tunngatillugu. 

Ilaatigut Tukuma Arctica atorlugu assartueriaaseqalernerup malitsigisaanik, Royal Arctic Linep Reykjavik avannaanit kujataaniillu sapaatip akunneri tamaasa aqqusaartalissavaa. Taamatullu attaveqalernera Tunup pilersorneqarnerani umiarsuarmik nutaamik atuinissamut periarfissaqalersitsivoq.

Taamatut aaqqiissuteqarnerup Tunup umiarsuaqarneranut malunnaatilimmik pitsanngoriaateqartitsinerata saniatigut, 108 TEU-mik umiarsualiineq Kitaani umiarsuarmik sillimmateqartitsinissamik aamma periarfissiissaaq, assersuutigalugu Avannaani quersuit upernaap ingerlanerani imaarnissaannut atatillugu atorneqarsinnaasumik, tamannalu piffissani Tunumi angalasoqannginnerani pisinnaassaaq.

Assartueriaasissap nutaap periarfissanik nutaanik maannangaaq ammaassinera, umiarsualiviillu amerlanerusut tikittalernerisigut nunatsinni pilersuinerup pitsanngorsarnissaanut eqaallisarnissaanullu nutaanik eqqarsarsinnaalernerput Royal Arctic Linemi nuannaarutigaarput.

AAMMA ATUARUK Tunumi umiarsuaqarnerup pitsaanerulersinnissaa Royal Arctic Linep misissorpaa

Taamatut aaqqiissuteqarnissamut isumassarsisuupput ingerlatsinermi sulisuvut, Tunup umiarsuaqarnerata pitsanngorsarnissaanut aaqqiissutissarsiorsimasut. Sulisutta innuttaasunik kiffartuussinerup qaffassarnissaanik kissaateqarnerat taama aaqqiissuteqarnermut pissutaavoq, isumaqarpugullu aaqqiissutaasoq Tunumi innuttaasunut, inuussutissarsiortunut sanaartornermillu suliaqartunut iluaqutaajumaartoq.

Umiarsuarmik containerilersuummik nutaamik pisineq Islandimut toqqaannartumik attaveqalernissamut periarfissarsiornissamik siornatigut nalunaarutigisatsinnik tunngaveqarpoq, Tasiilap sikuunnginnerata nalaani umiarsuaqartarnera ikinnerpaamik 50%-imik annertusarniarlugu. Taamatullu allanngortitsinermi Tasiilap siusinnerusukkut kingusinnerusukkullu tikittalernissaanut eqaallisaataassaaq, sikoqarnera silalu apeqqutaatillugit. Aammattaaq allanngortiterisoqarneratigut Tasiilaq nunarsuarmi assartuinikkut attaveqaatinut toqqaannartumik attavilerneqassaaq. Nioqqutissiallu umiarsuit timmisartullu ataqatigiissillugit Rekjavikikkoortumik nunarsuarmi neriniartarfinnut akimanernut nalunaaquttap akunneri 72-it ingerlaneriinnaanni apuunneqarsinnaalissapput. 

Allannguuteqartitsinermi Royal Arctic Linep umiarsuaatai DIS-it aamma ataatsimik ilaneqarput. Vestlandiap Siuana Arcticamik taarserneratigut umiarsuaatit taamaalillutik amerlineqassapput.