Sillimmasiinermi atugassarititaasut

Killilimmik akisussaaffeqarneq

Royal Arctic Linep akisussaaffini imarsiornermi inatsisit naapertorlugu assartuisartutut akisussaaffimmut killilerpai.

Tassa imaappoq assartukkat, toqqortarineqartut passunneqartullu ajoquserneri, tammarneriluunniit pillugit taarsiinissamut killilimmik akisussaaffeqartoqartarpoq.

Aningaasat taarsigassatut pisussaaffiusut nassiussamut ataatsimut SDR 667-iupput (DKK 6.500 missaat) imaluunniit imarsiornermut inatsimmi § 280 naapertorlugu kiilumut SDR 2 (DKK 20 missaat), tamatumani apeqqutaalluni assartukkanik piginnittup aningaasanik qassinik amerlanerpaaffiliisimanera.

Oqaatigineqassaaq containeri "nassiussisup pigisarisimanngippagu", taamaappammi containeri immikkut taarserneqassammat, FCL-containerit ataasiakkaat taarsiisarneq eqqarsaatigalugu nassiussatut ataatsitut isigineqartarmata.

Amigartumik pitsaanngitsumilluunniit poortukkat taarsiivigineqarneq ajorput. Aamma poortorneri ersittumik ajoqusersimanngippata nalinginnaasumik taarsiisoqarneq ajorpoq.

Taamaammat nassiussisut siunnersorneqassapput assartuinermut sillimmasiisaqqullugit, nassiussanik ajoqusertoqassagaluarpat tammartoqassagaluarpalluunniit aningaasartuutaasimasut tamakkerlugit taarserneqarsinnaaqqullugit.

Nassiussat illersorneqarsinnaasumik poortorneqarsimassapput, assartorneqarnerini passunneqarnerilu kiisalu quersuarmiitinnerini illersugaaqqullugit.

Nassiussat ajoqusersimasut sillimmasiinermut tunngatillugu suliassanngortinneqartut suliap naammassineqarnissaata tungaanut paarineqarallassapput.

Sillimmasiinissamut periarfissaq

Nassiussisoq nalinginnaasumik assartuinermut sillimmasiisuusarpoq. Assartugassamik inniminniinermut atatillugu Royal Arctic Linekkoortumik IF Skadesforsikringikkut assartuinermut sillimmasiisoqarsinnaavoq. Sillimmasiineq assartukkap akilerneranut ilanngullugu akilerneqartarami pisariitsuuvoq.

Nassiussamik inniminniinermut imaluunniit kingusinnerpaamik tunniussinermut ilanngullugu assartuinermut sillimmasiisoqartarpoq. Aatsaat sillimmasiissut atuutilertarpoq allaffissaq ”sillimmasiissutit aningaasartaat” inniminniivimmi kiisalu nassiussamik tunniussinermut uppernarsaammi immersorneqareeraangat.

Sillimmasiisoqartarpoq sillimmasikkap ulloq taanna nalinga naapertorlugu. Nassiunneqartut tamakkerlugit sillimmasernissaat pingaaruteqarpoq taamaanngippat nassiussat ilaannaat sillimmaserneqarsimappata ajoqusertoqarnerani amigartumik sillimmasiisoqarsimassammat.

Nassiussanik uppernarsaatit ataasiakkaarlugit sillimmaserneqartarput. Nassiussanik uppernarsaammi ataatsimi nassiussat akuleriiaappata, sillimmasiinikkut aningaasartaligaasunik, sillimmasiissutit aningaasartaat qaffasinnerpaaq sillimasiissutissanik naatsorsuinermi atorneqassaaq.

Pinerit ataasiakkaat ataasiakkaarlugit sillimmaserneqartarsinnaapput imaluunniit sillimmasiissut ingerlaavartussaq pilersinneqarsinnaavoq.

Sillimmasiissutit atuuffii

Assartuinermut sillimmasiissutit "Foreningen af danske Søassurandørers"-ip sillimmasiinermut atugassarititai, "Udvidede danske betingelser", (danskit atugassarititaat siammakkat) kiisalu "Dansk Søforsikringskonvention af 2. april 1934" (Imaatigut silllimmasiinermut danskit isumaqatigiissutaat 2. april 1934-imeersoq) naapertorlugit atortuulersinneqartarput. Aaqqiagiinngissuteqartoqartillugu atugassarititaasut isumaqatigiissutillu taakku aalajangiinermi tunngavigineqartassapput.

Sillimmasiinermi atugassarititaasut kiisalu aningaasartat Danmarkip Kalaallit Nunaatalu akornanni umiarsuarnut timmisartunullu, kiisalu Kalaallit Nunaata iluani assartuinermut atuupput. Aamma sillimmasiissutit Savalimmiunut, Islandimut, Norgemut, Sverigemut, Tysklandimut, Hollandimut, Tuluit Nunaannut kiisalu Amerikap avannarliup kangiata sineriaanut taakkunanngalu ingerlatitseqqinnermut atuupput.

Nunat umiarsualiviillu taakku Royal Arctic Linep sullitaasa avataanni ittut taakkununngaluunniit assartuisuutitat eqqarsaatigalugit nioqqutissanik piginnittoq assartukkanik immikkut ittumik sillimmasiissaaq.

Assartuinermut sillimmasiissut Royal Arctic Linemiititsinermut assartuisartullu suleqatigisat quersuiniititsinermut sillimmammi atugassarititaasut allat atuuttut ilanngullugit atuuttarput niusinermit ullut 30-t ingerlanerini.

Ullut 30-t taakku saniatigut toqqortarineqarnissaat naatsorsuutigineqarpat saniatigut sillimmasiisoqarsinnaavoq ikuallannermut, tillinniarnermut kiisalu ruujorinit imermik aniasoornikkut ajoqusernermut atuuttunik, kiisalu qaammatisiutini ullunut 30-nut aallartittunut sillimmasiisoqarsinnaavoq sivikinnerpaamik akunnerni 24-ni qamittoornikkut qerisut asiunerinut atuuttumik. Sillimmasiissutit atuutilerneri matuma kinguliani nassuiarneqassapput.

Ajoqusernerit sillimmasiinermut atasut

Sillimmasiissutit siuliani oqaatigineqartutut “Udvidede danske betingelser” (Danskit atugassarititaat siammakkat) naapertorlugit kiisalu aalajangersakkat tulliuttut naapertorlugit atuuffeqarput:

Umiarsuup iluani usit: Sillimmasiissut atuuppoq umiuinnermut, annakkumalluni eqqaasariaqarnermut kiisalu allatigut matussusigaanngitsumik ajoqusernernut, tassa ikuallannermik qaartoornermillu imaluunniit umiarsuit kivinerinik, tinnussaanermik, ikkarlinnermik imaluunniit sumut atavissumut puttasumulluunniit apornermik, soorlu sikunut allatigulluunniit aalajangersimasumik ajoqusernermik pissuteqartunut, ilaannakortumik tillinnermut tammarnermulluunniit tunngasunut.

Umiarsuup qaani usit: Sillimmasiissut umiarsuup iluani usinut atugassarititaasut naapertorlugit atuuppoq, tassanili pineqanngillat isugutammit manngertornimillu ajoqusertut, ilaappulli avammut igitat aamma/imaluunniit malinnit amusat.

Timmisartukkut nunakkullu assartukkat: Sillimmatit atuupput assartuinermi angallatigineqartup ajutoornerinut, kiisalu innarliinernut allanut, tillinniarnermut tammarnermulluunniit.

Assartukkat aalajangersimasumik kissassuteqartitat: Qeritillugit, nillataartillugit imaluunniit containerini aalajangersimasumi kissassuseqartillugit assartukkat eqqarsaatigalugit sillimmasiissut atuuttarpoq qerititsiviit/nillataartitsiviit minnerpaamik akunnernik 24-nik sivisussuseqartumik unittoornerisa toqqaannartumik kingunerisaanik ajoqusernernut.

Killigititat atuutsinngiffiilu: Biilit, campingvognit, traktorit, usilersuutit kiisalu entrepenørit maskiinarsui allat, angallatit nuannaariutit, illut ineriikkat, aalisariutit, umiatsiat assigisaallu eqqarsaatigalugit, assartugaq karsinut poorsimanersoq apeqqutaatinnagu sillimmammut killigitinneqartoq tassaavoq atortut atavissuunngitsut allallu immikkoortut tillinneqarnerinut tammarnerinulluunniit sillimatip atuutinnginnera.

Taarsiisoqarneq ajorpoq ajoqusernernut DKK 200 inorlugit nalilinnut kiisalu usit qaaniittut isuguttarnermik manngertorninermilluunniit, poortorsimannginnerannik amigartumilluunniit poortorneqarsimanerannik, iluatigut asiunermut, aattoornermik, kissarnermik nammineerluuniluunniit ikummarnermik, oqummik, teriarsuit, teriat, midit uumasuarsuilluunniit allat ajoqusiinerinik, silaannaap silalluunniit sunniutaanik, kissap allanngornerinik, qerinermik, umiarsuup seerineranik assigisaannilluunniit ajoqusernernik pissuteqartunut. Aamma ajoqusernerit ilaatinneqanngillat sorsoqqajaanermik, soorlu sorsuuttoqanngikkaluartoq qaartartunut torpedonullu navianartoqarneranik, pikititsinernik innuttaasullu eqqissiviilliornerinik, suliumajunnaarnernik mattussinernillu, tigusaanernik, arsaarinninnernik allatigulluunniit naalakkersuisunit oqartussanilluunniit iliornernik kiisalu atomimik mingutsitsinermik pissuteqartunut.

Sillimmasiissutip aningaasartaanik naatsorsuineq

Sillimmasiissutip aningaasartai sillimmasikkap nalinganut naapertuutissapput (akisussaaffiup aallartinnerata nalaani nalinganut), taannalu ima naatsorsorneqassaaq:

Nioqqutissat eqqussat: Pisiarinerinut uppernarsaatip aningaasartai, iluanaarutissanut sillimmasiinermullu akiliummut 10%-imik ilassusikkat.

Nioqqutissat annissat (CIF /CIP- nioqqutit: Nioqqutiginerinut uppernarsaatip aningaasartai, iluanaarutissanut sillimmasiinermullu akiliummut 10%-imik ilassusikkat.

Nioqqutissat annissat (nioqqutit allat): Nioqqutigineranut uppernarsaatip aningaasartai.

Nuunnermi assartukkat: Atortut atornikut nutaat pissarsiareqqinnerini aki

Nioqqutissat saniatigut nassiussat allat (aamma utertitat): Ullormut aki sumiiffimmi nassiussivimmi ullormi nassiussivimmi atuuttoq.

Aningaasartuutit ilaatinneqanngitsut: Immikkut ittumik isumaqatigiissusiortoqarsimatinnagu tikiunneqarfiini aningaasartuutit ilanngullugit sillimmaserneqartanngillat, kiisalu annaasat tikiussivimmi kingorna akiligassamik ingerlatitseqqinneq, usingiaanermi aningaasartuutinit, ilanngaaserinermit allanillu ajoqusernerit pissutigalugit pilersut aamma sillimmasiissummut attuumassuteqanngillat.

Assartuinermut akiliutip ilanngullugu sillimmasigaanera

Sillimmasiinermut akiliutinut taaneqartuni Royal Arctic Linemi assartuinermut akiliut ilanngullugu sillimmasigaavoq, taamaaliornikkullu nassiussat ajoqusivissorsimasut imaluunniit tammarneqartut assartorneqarnerat sillimmasiisarfimmit taarserneqassalluni. Nassiussap nalingata ajornerulerneranut imaluunniit iluarsartuunneqarnissaannut taarsiissuteqartoqartillugu assartuinermut tunngasortaanut taarsiissuteqartoqassanngilaq.

Assartuinermut akiliutip ilanngullugu sillimmasigaanera nuunnermi angalanermilu nassiussanut atuutinngilaq, nassiussat immikkut sillimmasiissummik sillimmasigaasimanngippata.

Sillimmasiissutip atuutilernerani atuukkunnaarneranilu

”Danskit atugassarititaat siammakkat” naapertorlugu sillimmasiisoqartarpoq, taakkulu ”illumiit illumut” atuuttarput, imaluunniit sillimmasiisup nioqqutissamut sillimmasiisinnaassusia naapertorlugu (assersuutigalugu ”Incoterms 2020” naapertorlugu pisianut/nioqqutigisanut. Taakkununnga ilanngullugit makkuttaaq atuupput:

Nassiussat ataasiakkaat nalinginnaasut: Nassiussap aallarunneqartussanngorlugu Royal Arctic Linemut tunniunneqarneraniit, tamatuma kingorna Kalaallit Nunaanni Danmarkimiluunniit apuunneqarfissaanut kingorna assartorneqarnera ilanngullugu, tassunga ilanngullugu Royal Arctic Linep assartukkamik containerimut issoraalluni niooraallunilu passussinera ilanngullugu. Nuunnermi assartukkat sillimmaserneqarnerat atuuttarpoq poortorneqarnerannit puuiarneqarnerannut, tassa Royal Arctic Linep apuussineranut ilanngullugu puuiaasoqarsimappat imaluunniit Danmarkimi Kalaallilluunniit Nunaanni nutserisut suleqatigisat aqqutigalugitpisimappat.

Royal Arctic Linemi imaluunniit Danmarkimi Kalaallilluunniit Nunaanni nutserisuni suleqatigisani toqqortarineqarallarnerat qaammatisiutit ulluini 30-ini sivisunerpaamik sillimmasiinermut ilaavoq.

Nassiussat immikkut ittut: (Soorlu entreprenørmaskiinat, biilit, kivittaatit il.il., kutterit nuannaariutillu). Nassiussap usiliussassanngorlugu tiguneranit apuunneqarfiani niuneranut. Angallatit imaaniittut eqqarsaatigalugit sillimmasiissut atuuttarpoq usiliunneraniit angallatip nammineerluni puttaqqilerneranut, tassa assartuinerup naanerata kinguninngua immitsisoqarsimappat.

FCL: Nassiussat FLC-it eqqarsaatigalugit sillimmasiissutit atuutilersarput sillimmasikkat assartorneqartussanngorlutik quersuaq imaluunniit aallarfik sillimmasiissummi pineqartoq qimakkaangassuk. Sillimmasiissut atuukkunnaartarpoq assartugaq apuuffissamut sillimmasiissummi pineqartumut apuukkaangat.