Royal Arctic Linep 2024-mut ukiumoortumik angusat naammagisimaarnartut saqqummiuppai
2024-mut ukiumoortumik naatsorsuutit pingaarnertut suliaqarfiup ingerlalluarneranik aammalu akileraannginnermi 6 millionit koruuninik naammagisimaarnartumik angusaqarnermik takutitsipput.
2024-mi ukiup affaata siulliup kingorna 15-20 millionit koruunit akornanni amigartooruteqarnissarput naatsorsuutigaarput, pingaartumik ingerlatseqatigiiffiutigisami Arctic Umiaq Linemi aningaasatigut pitsaanngitsumik ineriartortoqarnera pissutigalugu. Ingerlatseqatigiiffimmi aqutsisumi aammalu Arctic Umiaq Linemi arlalinnik suliniuteqarnerit angusanut malunnaatilimmik pitsanngorsaaqataapput.
Naammagisimaarnartumik aningaasaqarnikkut angusaqarnerup saniatigut imarpikkut ingerlaarnermi angalanermut pilersaarut sullitatta kissaatigisaannut maanna oqimaaqatigiinnerulersinneqarpoq, piffissamillu eqquilluartarneq 2024-mi aamma pitsaanerulersinneqarluni. Piginnittut sullitallu qanittumik oqaloqatigineqartarnerat Royal Arctic Linep ingerlateqqinniarpaa nukittorsarlugulu, sullitatta pisariaqartitaat ingerlatseqatigiiffiup pilersaarusiorneranut qitiusumik inissisimanissaat qulakkeerumallugu – pilersuinerup isumannaatsuunissaata sunniuteqarluartumillu ingerlatsinissap ukkatarineqartuarnissaannut ingiaqatigiissillugu.
Ukioq 2024 naammassilluaraluartoq ingerlatseqatigiiffiup aningaasaqarnerata nukittorsaqqinnissaa Royal Arctic Linep pisariaqartippaa Nunatta pilersorneqarnera siunissamut qularnaarsinnaajumallugu.
2025-mut naatsorsuutigisat
Suliffeqarfissuup 2025-mi akileraannginnermi (EBT) 15-25 millionit koruuninik angusaqarnissaa naatsorsuutigineqarpoq.
Aningaasatigut iluanaaruteqartarnerup ukiuni aggersuni tamaaginnarnissaa pingaaruteqarpoq, tamanna umiarsuarnut nutaanut, pramminut nassiussalerinermilu systemimut ullutsinnut naleqqunnerusumut aningaasaliinissanut aammalu umiarsualiviit terminaliini sulinermi pissutsit pitsanngorsarnissaannut ingerlatseqatigiiffik aningaasalersuisinnaatitsissammat.
Ingerlatseqatigiiffiup angusai nassiussat amerlassusiisa ineriartorfiunerannut ataqatigiilluinnarput. Mittarfiliortiternermillu suliniutit angisuut pingasut attaveqaasersuutinillu suliniutit angisuut allat naammassisussanngornerini, aammalu aalisakkanik avammut nioqquteqarnerup kinguariartorfiunerani, 2025-mi nassiussat amerlassusiat iluatsissagaanni 2024-mut naleqqiullugit allannguuteqannginnissaat naatsorsuutiginerpoq. Pitsaanerpaamik angusaqarnissaq pilersinneqassaaq assartuinermi akigititanik, atuutilersinneqareersumik, naleqquttumik qaffaanikkut, aammalu ingerlatseqatigiiffiup ingerlatsinermi aningaasartuutigisartagaanik aningaasaliisarneranillu aqutsilluarnermut ataqatigiissitsisoqarneratigut.
Arctic Umiaq Linep takornarianut aningaasarsiorfigineqarsinnaanerusunut 2024-mi sulissuteqarnerata kingorna, sineriak sinerlugu imaatigut ilaasunik angallassinermi najukkami innuttaasut pisariaqartitaasa ukkatareqqilernissaat politikkikkut annertuumik kissaatigineqarpoq. Sarfaq Ittuk ukiumi angalaffiusumi 2025-mi Qaqortup Ilulissallu akornanni sapaatit akunnikkuutaartumik kaajallaasaleqqissaaq sumiiffinnullu allanut ingerlaqqinnissamut periarfissaqartitsissalluni. Kiffartuussinissamik isumaqatigiissut maanna atuuttoq ukiup naanerani atorunnaassaaq, aammalu 2025-mi 15 millionit koruunit angullugit amigartooruteqarnissamut qularnaveeqqutinik matussutissaqartinneqassalluni. Tamannalu tunngavigalugu Arctic Umiaq Linep suliffeqarfissuup naatsorsuutaanut 2025-mi, pitsaasumik pitsaanngitsumilluunniit, sunniuteqarnissaa naatsorsuutigineqanngilaq. Arctic Umiaq Linep 2025-p kingorna siunissaa Namminersorlutik Oqartussat oqaloqatigalugit qaammatini tullinnguuttuni 3-6-ini erseqqissarneqassaaq.
Naatsorsuutigineqarpoq suliffeqarfiup naatsorsuutai pisortatigoortumik akuerineqassasut suliffeqarfiup ataatsimeersuarnerani ulloq 14. Maj 2025.
Paasissutissanut amerlanerusut pillugit attaveqarfigineqassaaq:
Jørgen Aqe Møller, Aningaasaqarnermut pisortaq, jaqm@ral.gl