Tasiilamut umiarsuaq pajuttoq siulleq

Malik Arctica marlunngornermi maajip 21-ani Århusimit aallarpoq Tasiilamut ingerlaarluni. Pilersaarutit malillugit Tasiilaq ukioq manna umiarsuarmit pajuttumit maajip 27-ani siullerpaamik tikinneqassaaq.

Royal Arctic Linep DMI-p sikunik alapernaarsuiffia qanittumik suleqatigaa, tassanngaanniillu Nunatsinni sumiiffinni assigiinngitsuni sikoqassuseq pillugu umiarsuit ingerlaavartumik ilisimatinneqartarput. Malik Arcticap Tasiilamut aqqusaarnissaa pillugu Jens Jakobsen DMI-p sikunik alapernaarsuiffianeersoq ima oqarpoq:

”Tasiilap avataani sikorsuit 65 kilometerisut isorartutigisumik siaarsimapput. Ukiuni kingullerni piffissap taamaalineranut naleqqiullugu marloriaatingajaanik sikorsuaqarneruvoq. 2020-mi Tasiilap tungaanut imaannaavoq, 2021-llu aamma 2023-p akornanni sikorsuit 20-40 kilometerisut isorartutigisumik siaarsimallutik.

Jens Ole Nielsen, Royal Arctic Linemi ukiorpassuarni umiarsuarnik pilersaarusiortuusoq misilittagaqarluartorlu ima oqarpoq:

”DMI-p sikunik alapernaarsuiffianik suleqateqarnerput umiarsuit ingerlaarnissaannik pilersaarusiornermut atatillugu assut iluaqutaasarpoq, pingaartumik ukiuunerani maannalu aamma upernarnerani. Illoqarfiit sikusartuniittut ukioq manna umiarsuaqaqqaarnissartik naatsorsuutigisinnaanngulerpaat, sikoqassuserlu ukiumit ukiumut allanngorartuarmat suleqatigiinneq pingaaruteqarpoq, umiarsuup inuttaatalu isumannaatsumik angalanissaannik pilersaarusiorsinnaanerput qulakkeerneqarsinnaammat.

Royal Arctic Linep sikoqassuseq piffissami aggersumi qanittumik malittariniarpaa, tamannalu Tunumut Avannaanullu atuuppoq, Siuana Arcticammi Upernavimmut maajip 23-ani tikinnissaa naatsorsuutigineqarmat. Sumiiffimmi tassani sikoqassusia atoruminarnerusutut isikkoqarpoq Siuana Arcticallu pilersaarutit malillugit tikissinnaanissaa naatsorsuutigineqarpoq.