Dettifossip angalanera 423 kinguaattoorpoq

Dettifossip angalanera 423 Nunatsinnut tikiffissaa akunnernik aqqaneq-marluk missaannik kinguaattuussaaq.
Umiarsuaq Nuummut tikissaaq juunip 28-anni nal. 06:00 taassumalu kingorna usingiaaneq aallartissaaq.

Kinguaattoorneq Savalimmiuni piffissami sivitsulersumi suliumajunnaartoqarsimaneranik peqquteqartoq maanna Thorshavnimiit Islandimut useqarnerulluni ingerlaarnissamik kinguneqarpoq.
Taamaattoqarnera pillugu Eimskipip Royal Arctic Linellu immikkut ittumik angalatitsillutik avannamukaartumi Thorshavn aqqusaarneqartussanngortippaat.

Savalimmiuni sullissinermut piffissaq atorneqartussaq sivikinnerutinniarlugu Royal Arctic Linep sullissai Thorshavnimiit nassiussisinnaanerat matoqqatinneqarpoq.
Thorshavnimiit aamma Thorshavnimut nassiussiniaraanni nalinginnaasumik ingerlaarfiit atorlugit inniminniisoqarsinnaavoq.

Usingiarnermi nerisassat nioqqutissallu qaangiuttoorsinnaasut Nuummi pisiniarfinnukaanneqartussat siulliunneqarumaarput.

Sineriammut nassiussat kinguaattoortoqarnera malugisussaavaat, taamaattorli angummateqqittoqarnissaa naatsorsuutaavoq imarpillu ikaarlugu umiarsuarmik nassiussat ingerlateqqitassat piffissaq eqqorlugu ingerlassallutik.

Sullitat nassiussarsisussat qaqugukkut nassiussarsiamik aaneqarsinnaalernissaannut paasisaqarusukkunik track & trace aqqutigalugu malinnaasinnaapput.

Annertunerusumik paasisaqarusukkuit Sullissinermut Kiffartuussivik ugguuna saaffigiuk kundeservice@ral.gl

Allanngortoqaqqissinnaanera sillimaffigeqquneqarpoq.