Niels Clemensen Royal Arctic Line A/S-imi pisortaaninngorpoq

Royal Arctic Line A/S-imi siulersuisut pisortatigoortumik sulisussarsiorneq ingerlanneqareersoq Niels Clemensen ingerlatseqatigiiffimmi pisortaanertut toqqarpaat. Niels Clemensen atorfimmi marsip aallaqqaataani 2024-mi pisortatigoortumik sulilissaaq.

Ingerlatseqatigiiffiup siulersuisuinut siulittaasup Pâviâraq Heilmannip atorfinitsitsineq ima oqaaseqarfigaa: 

” Ingerlatseqatigiiffimmi pisortaanertut atorfiup eqqortumik inuttalerneqarnissaa anguniarlugu sulisussarsiornerup pimoorussamik sunniuteqarluartumillu ingerlanneqarnissaa pingaartissimavarput. Royal Arctic Line A/S attaveqaasersuutinik pingaarutilinnik isumaginnittuuvoq taamaalillunilu aamma Nunatsinnut tamarmut pingaaruteqartupilussuulluni, nioqqutissanik eqqussuinermut tunngatillugu, pingaartumillu aamma Nunatsinni tunisassiat avammut niuerutigineqarnerannut tunngatillugu.

Sulisussarsiortarfik avataanersoq suleqatigalugu sulisussarsiorneq ingerlanneqarpoq piukkunnaatilinnillu nalilersuisoqareersoq siulersuisut qularutiginngilaat Niels Clemensen atorfiup isumaginissaanut eqqortuusoq.

Atorfigisimasat
Niels Clemensen Royal Arctic Line A/S-imi atorfinitsinneqaqqaarpoq januaarip aallaqqaataani 1993-imi, ullormi ingerlatseqatigiiffiup pilersinneqarfiani, shippingillu iluani sivisuumik aamma suliaqarsimalluni.

Siornatigut akisussaaffeqarfigisimasai ilaatigut tassaapput:

• Royal Arctic Line A/S-imi Tuniniaanermut pisortaq,
• Port of Hanstholmimi pisortaaneq,
• Royal Arctic Line A/S-imi Head of Network & Strategic,
• Royal Arctic Bygdeservice A/S-imi pisortaaneq,
• Royal Arctic Line A/S-imi Head of Liner Traffic,
• Royal Arctic Spedition A/S-imi Nassiussalerinermut pisortaq,
• Royal Arctic Line A/S-imi Tuniniaanermut Nittarsaassinermullu pisortaq,
• KNI A/S-imi Shippingman,
• J. Lauritzen A/S-imi Operation manager,
• Fabricius Marine A/S-imi Commercial Director,   

Verner Hammeken taarserpaa
Niels Clemensenip Verner Hammeken Pisortaanertut taarserpaa. Verner Hammeken 2015-imit 2023-mi ingerlatseqatigiiffiup suleqatigiunnaarnissaata tungaanut pisortaaneruvoq. Suleqatigiunnaarneranullu atatillugu pisortaanermik nutaamik toqqaasoqarnissaata tungaanut Niels Clemensen pisortaanerugallartussatut toqqarneqarpoq.