Nanortallip aqqusaarnissaanut sikorsuit akornutaasut

Sikorsuaqarnerata nalaa unammilligassaqarfiusartoq maanna nalaassimalerparput.

Nanortallip eqqaani sikorsuaqarnera pissutigalugu Nanoq Arcticap maanna angalanermini 404-mi illoqarfik ajoraluartumik tikissinnaasimanngilaa. Umiarsuaq Narsamut uterpoq usillu Nanortalimmukartut tassani niuneqarput Irena Arcticap angalanermini tullermi 405-imi Nanortalimmut misileeqqinnissaata tungaanut uninngatinneqarallassallutik. Sikorsuit ingerlaarnerat malinnaaffigaarput pilersaarutivullu ingerlaavartumik naleqqussassavagut.

Angalanermut tullermut 405-imut tunngatillugu Kujataani pissutsit nakkutigeqqissaassavagut. Kippasimmik sakkortuumik anorlissangatinneqarmat sikorsuit kangerlunnut isaallutik ajornakusoortitsinissaat naatsorsuutigaarput. Sikorsuaqangaatsiarnera Saarlup Nanortallillu eqqaanni sikut assilineqarnerannit naqissuserneqarpoq.

Qeqertarsuup Tunuani Irena Arcticap angalanera kingulleq ingerlalluarpoq, naak Qasigiannguit eqqaanni siku issunerulersimagaluartoq. Taamaattorli umiarsuaq nunaqarfiliartaat Ivalo Arctica Qeqertarsuarmut apuussinnaasimanngilaq sikuuallaarnera pissutigalugu. Ivalo Arcticalli Kangaatsiamut aqqusaarnera pilersaarutit malillugit iluatsilluartumik naammassineqarpoq. Qeqertarsuup Tunuanut angalanissarput tulleq pissaaq marsip aallartinnerani angalanermi 406-imi.

Angalanermut pilersaaruterput atuuttoq nittartakkatsinni malinnaavigineqarsinnaavoq: https://www.ral.gl/ingerlaarfiit/umiarsuit/