Akigititanik allannguinerup immikkoortuata aappaa Royal Arctic Linep atortussanngortissavaa, 2025-mi januaarip aallaqqaataanit atuutilersumik

Royal Arctic Linep assartuinermut akigititaata naleqqussarnissaannut ukiunut pingasunut atuuttumik pilersaarut Naalakkersuisunit novembarimi 2023-mi akuersissutigineqarpoq. Assartuinermut akigititat allannguutissaannut immikkoortup aappaa 2025-mi januaarip aallaqqaataanit atuutilissaaq. Aningaasalersuinissanut takkuttussanut ileqqaagaqarnissap qulakkeernissaanut akigititat 3,1 %-inik qaffanneqassapput, tassungalu ilanngullugit akigititanik 2,5 %-inik ingerlaavartumik qaffaaneq.

ETS-imut tapiliuttagaq (Emission Trading System), tassaavoq EU-mut/EØS-imut aamma EU-mit/EØS-imit imaatigut assartuussinermi CO2-mik aniatitsisinnaanermut EU-mit akuersissut,  taannalu 1,27 %-init 1,57 %-inut qaffanneqassaaq. ETS-imut tapiliuttagaq EU-mut akilerneqassaaq, taamaattumik akitsuut akilerneqartoq Royal Arctic Linemut akiliutaanngilaq.

Uuliamut aningaasallu nalinginut tapiliuttakkamut tunngatillugu maannakkorpiaq 10 %-imiinnera atuutiinnassaaq. Royal Arctic Linep uuliamut aningaasallu nalinginut tapiliuttagaq iluanaaruteqarfigineq ajorpaa, tapiliut atortarpoq uuliamut akit aningaasallu nalingisa allanngoriartornerisa sunniutaannut ingerlatseqatigiiffik qajannaarsarniarlugu.

Akigititat naleqqussarnissaannut ilusiliat assigiinngitsut Naalakkersuisunut nunatsinnilu inuussutissarsiuteqartunut 2023-mi saqqummiunneqarput. Illuatungeriillu akornanni oqaloqatigiinnerup kingunerisaanik ilusiliaq toqqarneqartoq atorlugu akigititanik naleqqussaanissaq ukiut pingasut ingerlanerini pisussanngorpoq, assartuinermut akigitinneqartut 2024-mi 6,4 %-inik, 2025-mi 3,1 %-inik aamma 2026-mi 2,2 %-inik qaffaasoqartussanngorlugu. Qaffaanerup tamarmiusup ataatsikkoortumik atulersinneqarnissaanut naleqqiullugu akigititanik qaffakkiartuaartitsinissaq sullitanut naleqqunnerussasoq illuatungeriinnit nalilerneqarpoq. Akigititanillu tassanngaannartumik qaffaasoqarnissaa pinngitsoorniarlugu peqatigisaanik aalajangiunneqarpoq siunissami akigititanik ingerlaavartumik, siullermik 2025-mi, ukiumut 2,5 %-inik qaffaasoqartassasoq.

Paasissutissat amerlanerusut pillugit attaveqarfigineqassaaq:
Tuniniaanermut pisortaq John Aage Nielsen, johni@ral.gl