Royal Arctic Line A/S-imi ukiup affaani siullermi ingerlatsinermi angusat naammagisimaarnartut
Inuiaqatigiinni kalaallini aningaasarsiornikkut ingerlatat Royal Arctic Linep nassiussanik assartugaata annertussusaatigut taamatullu aamma ingerlatseqatigiiffiup kaaviiaartitaatigut ersersinneqartarput.
2024-mi ukiup affaani siullermi assartukkat ataatsimut annertussusaat 1 procentimik kinguariarput, nassiussanut immikkut ittunut, kisermaassiviusumi avannamut kujammullu assartukkanut kiisalu Nunatsinni illoqarfiit akornanni assartukkanut agguataarsimallutik.
Nassiussat immikkut ittut malunnaatilimmik 30 procentit sinnerlugit kinguariarfiupput, suliniutit angisuut naammassiartulernerisa aningaasarsiornikkullu unikaallattoqarnerata kingunerisaanik. Nuuk Imerup ukiut nikinneranni matuneqarnera avannamut assartukkat 9 procentinik siuariarfiunerannik kinguneqarpoq, tamannalu pingaartumik immiaaqqanik sodavandinillu assartuinermik pissuteqarpoq aammalu puiaasanik utertittakkanik assartukkat ikilinerisa sinerissami assartukkat 7 procentinik kinguariarfiunerannik kinguneqarluni.
Kujammut assartukkat 7 procentinik kinguariarfiupput, aalisakkanik qalerualinnillu avammut nioqqutissanik tulaassorneqartut 20 procentinik kinguariarfiunerat tamatumunnga pissutaalluni.
Arctic Umiaq Line
Ingerlatseqatigiiffiutigisap Arctic Umiaq Linep periusissiaq nutaaq 2023-mi saqqummiuppaa, nunatsinni angallassinermut siunissamilu takornariartitsisarnerup inerisarneqarnissaanut tapersersuinissaq tamatumani siunertarineqarluni. Periusissialli naatsorsuutigineqartunik naammassisaqarsinnaasimannginnera oqaatigineqartariaqarpoq naatsorsuutigisamiillu tunisakinnerusoqarnera ukiumut tamarmiusumut tunngatillugu DKK 15-20 millioninik amigartooruteqarnissap naatsorsuutigineqarneranik kinguneqarluni.
Ingerlatseqatigiiffik patajaallisarumallugu pisortamik nutaamik atorfinitsitsisoqarpoq tamatumunngalu ilanngullugu ingerlatseqatigiiffiup siunissami imminut nammassinnaanissaa qulakkeerniarlugu periusissiaq nutarterneqassalluni.
2024-mut naatsorsuutigineqartut
Aningaasarsiornikkut ingerlatani kinguariartoqarnerata kingunerisaanik assartukkat annertussusiisa ataatsimut isigalugit 1 procentimik kinguariarfiunissaat naatsorsuutigineqarpoq.
Ingerlatseqatigiiffiup pisortaqatigiivisa ingerlatseqatigiiffimmi pingaarnerusumi angusat kisiisa eqqarsaatigalugit naammagisimaarinnipput, ajoraluartumilli oqaatigisariaqarlugu ingerlatseqatigiiffiutigisami Arctic Umiaq Linemi pitsaanngitsumik ineriartortoqarnera suliffeqarfissuup 2024-mut tamarmut angusaanut pitsaanngitsumik kinguneqassasoq.
Ingerlatseqatigiiffiup ukiup affaanut siullermut nalunaarutaa, aningaasaqarnermut kisitsisit pingaarnerit ilanngullugit ingerlatseqatigiiffiup nittartagaani pissarsiarineqarsinnaapput.
Paasissutissat annerusut piniarlugit attavigineqarsinnaavoq
Aningaasaqarnermut pisortaq Jørgen Aqe Møller, jaqm@ral.gl, tlf. 34 91 24