Kujataani sikorsuaqarnera suli ajornartoortitseqqavoq
![](/media/1252789/20230421_0931_rcm.jpg?w=817&h=&mode=canvas)
Nunatta Kujataani sikorsuaqarnera anorlerneralu peqqutaallutik Tilioq Arcticap angalanera 312 taamaatiinnarneqarpoq.
Tilioq Arcticap angalanera 312 ukununnga pisussaagaluarpoq: Kangilinnguit, Arsuk, Qassimiut, Narsarsuaq, Qassiarsuk, Eqalugaarsuit, Saarloq kiisalu Igaliku.
Tilioq Arcticap angalanissaa tulleq, angalaneq 313, pilersaarutit malillugit Qaqortumiit apriilip 27-anni aallassangatinneqarpoq.
Royal Arctic Linep sikorsuit ingerlaarnerat malinnaaffigilluarpaa. Sikorsuit akulloqquallugit ingerlasoqarsinnaalissagaluarpat taamaalillunilu nunaqarfiit Tilioq Arcticamit tikinneqarsinnaalerlutik, taava pilersaarummik nutaamik saqqummiussisoqarumaarpoq.