Quersuit ulikkaaqqasut Århusip umiarsualiviani ajornartorsiutinik pilersitsipput

Nioqqutissat nalinginnaasumik piumaneqarnerisa tassanngaannartumik ilimaginngisamillu allannguuteqarnerat nunarsuarmi pilersuiffiusunut annertuumik sunniuteqarpoq. Tamatumalu malitsigisaanik Europami umiarsualivissuarni arlalinni containerit eqqussukkat uninngasuutigineqartut amerleriapiloorput, taamatullu aamma Århusip Umiarsualiviani. Tamannalu Århusip umiarsualiviani containerit ingerlaartinneqarnerinut annertuunik unammilligassaqartitsivoq umiarsuaatileqatigiiffiit sullitaannut akornutaasumik, taamatullu aamma Royal Arctic Linep sullitaanut.

APMT terminals (Maersk) Århusimi umiarsualivimmi ingerlatsisuusoq pissutsit taamaannerisa iluarsiniarnissaannut arlalinnik suliniuteqarpoq. ”Uatsinnut sullitatsinnullu erloqinartupilussuuvoq, pisorli immikkut illuinnartuummat utaqqiisaagallartuullunilu, ajornartorsiutip aaqqiissuteqarfiginissaa peqataaffigiumallugu Århusimi APMT terminals sapinngisatsinnik suleqatigaarput”, Royal Arctic Linemi tuniniaanermut pisortaq Niels Clemensen oqarpoq.

Pissutsit taamaannerat immikkut illuinnartuuvoq utaqqiisaagallartuullunilu, ilaatigut nukissiuutinut akit qaffakkiartortut sunniuteqarfigisaannik pisisartut pissusilersuutaasa allannguuteqarnerannik pissuteqarluni. Tamanna ilaatigut nioqqutissat Danmarkimi quersuarni uninngasuutigineqartut amerleriapiloornerannik kinguneqarpoq Århusimilu terminalimi containerit ingerlaartinneqarnerinut sunniuteqarluni, containerinik aallertoqartarnera containerillu imaarneqartarnerat pisarnermit sukkatiginngimmat.

Taamatut unammilligassaqarnera sapaatit akunnialunni suli atuutissasoq naatsorsuutigineqarpoq, suliniutilli aallartisarneqartut iluaqutaalereersutut isikkoqarput pissutsillu sapaatit akunneri marlussuit ingerlanerini iluarsisimanissaat naatsorsuutigineqarluni.

Immikkut illuinnartumik pisoqarnera ataavartunngoratarsinnaasutut Royal Arctic Linep isiginngilaa. ”Siulittuutigineqarsimasinnaanersoq sunniutaasullu ajornerpaat pinngitsoortinnissaannut iliuuseqartoqarnerusimasinnaanersoq oqallisigineqarsinnaajuaannarpoq, immikkulli illuinnartumik pisoq Danmarkip angallavigineqarneranut tunngatillugu allannguuteqartitsissanngilaq”, Royal Arctic Linemi Ingerlatsinermut pisortaq Ivalu Kleist oqarpoq.