Arctic Umiaq Line A/S nutaamik pisortartaassaaq

Jens-Jakob Sandgreen Arctic Umiaq Line A/S-imi septembarip 15-iani 2022-mi atuutilersumik pisortassatut Arctic Umiaq Line A/S-ip siulersuisuinit toqqarneqarpoq.

Arctic Umiaq Linemi maanna pisortaasup Aviâja Lyberth Lennertip Royal Arctic Linep piujuaannartitsinissamik attaveqaqatigiinnermillu suliaqarnerata annertusarnissaanik suliaqarnini aallukkumallugu toqqarsimavaa. Tamatumunngalu peqatigitillugu Arctic Umiaq Linemi nutarterinermik suliniuteqartoqartussaavoq, tamatumanilu piffissaq tamakkerlugu pisortaqaqqilerneq aamma iluaqutigineqassalluni.

“Arctic Umiaq Linep ukiuni kingullerni tallimani iluatsitsiffiulluartumik ingerlaneranut tunniusseqataasimaneranut Aviâja qutsavigaarput. Aviâja pissutigerpiarlugu nunap immikkoortuini ingerlatseqatigiiffiup atuuffigisaani Arctic Umiaq Linep soqutigineqarnera annertusiartorsimavoq. Arctic Umiaq Line innuttaasut akornanni atassuteqaataavoq pingaarutilik, aamma timersornermut piorsarsimassutsimullu tunngatillugu, soorlu tamanna aamma assersuutigalugu Sarfaq City Runip ingerlanneqartarnerani takuneqarsinnaasoq. Ingerlatseqatigiiffik pitsaasumik inissisimavoq ineriartorteqqinneqarnissaminullu toqqammavissaqarluarluni”, siulersuisuni siulittaasoq Verner Hammeken oqarpoq nangillunilu:

“Jens-Jakob Sandgreenip ajornartorsiutinik aaqqiiniarnermik nutaanillu inerisaanermik annertuumik misilittagaqarnini sullitallu sullinneqartarnerisa immikkut tappiffiginiarneqarnerat atorfittaanimut nassassavai, taamaattumillu siulersuisuni isumaqarpugut mittarfinnik nutaanik pingasunik peqalernerani takornariartitsinikkullu periarfissat malunnaatilimmik annertusineranni Arctic Umiaq Linep siuttuuffiginissaanut piginnaasassat pisariaqartut pigigai. Aammattaaq Jens- Jakob Sandgreen nunanut tamalaanut sammisumik isiginnittaaseqarpoq tassuunalu nunatsinnit isiginnittaaseq aamma saqqummiunneqarsinnaalluni”.

Jens-Jakob Sandgreen ima oqaaseqarpoq: “Ukiuni qulikkuutaani nunani tamalaani aallarnisaasutut aammalu Qaanaamit Nanortalimmut inuussutissarsiutinik ingerlatalinnut siunnersortitut sulereerlunga siunissap qanoq immersornissaa alaatsinaaffigalugu Arctic Umiaq Line suliffigilertussanngorpara. Takornariartitsisarneq angalariaaserlu allanngorput, Arctic Umiaq Linemilu suleqatigiit peqatigalugit sinerissami inuussutissarsiutinik ingerlatallit takorluuisinnaasut suleqatigalugit nunarsuarmi nioqqutinik pilerinarluartunik qanoq pilersitsisinnaanerput angalanermilu misigisassanik nutaanik Nunatsinnullu periarfissanik ilusilersuinissaq misissussallugu qilanaarivara”.  

Arctic Umiaq Line A/S Kitaata sineriaani Ilulissat Qaqortullu akornanni sumiiffinnik 10-11-nik tikittagaqarluni umiarsuaq Sarfaq Ittuk atorlugu imaatigut angallassisuuvoq. Ingerlatseqatigiiffik taamaalilluni Kitaani ilaasunik angallassinermi pingaarutilimmik inissisimavoq. Ingerlatseqatigiiffik Royal Arctic Line A/S-imit tamakkiisumik pigineqarluni suliffeqarfiutigineqarpoq.