Aalborgip umiarsualivia suleqatigiilluarnikkut pitsaasunillu isumaqatigiissuteqarnikkut ataqqinarpaluttumik qimanneqarpoq
Nunarsuaq tamakkerlugu nalorninartorsiortoqarnera Royal Arctic Linep assartugaata annertussusaannut suli sunniuteqanngilaq. Nunatsinnut nunatsinniillu assartukkat annertussusaat taamaalillutik 2021-mi assartorneqartut assigivaat, attaveqaasersuutitigut suliniutinit annertuunit suliffissaqarluarneranillu ikorfartorneqarluni.
Ilaatigut DHL suleqatigalugu niuerfimmut nutaamut appakaannissamik suliniuteqarneq inerititaqarfiulerpoq assartukkallu annertussusaat siorna piffissap taamaalineranut naleqqiullugit 2022-mi ukiup affaani siullermi 400 %-inik qaffapput.
Angusassat pingaarutillit arlallit ukiup affaani siullermi anguneqarput. Umiarsuit sanatinneqartut kingulliit tunniunneqarput Royal Arctic Linellu umiarsuaataanik nutarsaaneq annertooq maanna naammassivoq, umiarsuaatinillu nutarsaanerup tamatumalu aningaasalersorneqarnerata piffissami aningaasat naleerukkiartornerisa appasissumiinnerini erniallu aappasissumiinnerini naammassineqarnerat Royal Arctic Linep naammagisimaarpaa. Sullissisut avataaneersut isumaqatigiissuteqarfigineqarput, tamatumalu malitsigisaanik Nunatta avataani usit tamalaat isumagineqartarnerat Royal Arctic Linep nammineerluni isumagiunnaarpaa, taarsiullugulu qanittumik suleqatigisat isumaqatigiissuteqarfigineqarput, siunissami Nunatsinnut nunatsinniillu nassiussanik assartuinerup pisariinnerulernissaanut periarfissiisinnaasumik, Nuummi Tasiilamiluunniit najugaqarneq apeqqutaatinnagu. Allatut oqaatigalugu, Nunatta tamarmi nunarsuup sinneranik niueqateqarnera ajornannginnerulissaaq.
Aalborgip Umiarsualivia aamma ataqqinarpaluttumik inuulluaqquneqarpoq, illuatungeriit akuusut tamarmik isumaqatigiissutinik pitsaasunik siusissukkut isumaqatigiissuteqarmata, taamaaliortoqarneratigullu umiarsuarmik naggammik aqqusaartoqarnissaa tikillugu Aalborgip Umiarsualiviani ingerlatsinerup akornuserneqannginnissaa qulakkeerneqarluni.
Aalborgip aalajangersimasumik aqqusaarneqartarnerata atorunnaarnera ataasiartumik aningaasartuutinik arlalinnik kinguneqarpoq ukiup affaanut siullermut naatsorsuutinut ammut sunniuteqartumik. Ataasiartumik aningaasartuutaasut tamarmiusut DKK 27 millioniupput. Ataasiartumillu aningaasartuutit umiarsuarnillu nutarsaanerup malitsigisaanik nalikilliliinerit annertunerusut ilanngaatigalugit naatsorsuigaanni ukiup affaani ingerlatsinermi angusat 2021-mi angusat assigaat.
Ukiup affaanut siullermut angusat naatsorsuutigisanut naapertuupput taamaattumillu 2022-mut DKK 56-66 millioninik amigartooruteqarnissamik naatsorsuutigineqartoq aalajangiusimaannarneqarpoq. Aningaasat naleerukkiartornerat qaffasissoq ernianillu qaffaarujussuarnerit kingunerisaannik aningaasarsiornikkut unikaallattoqaratarsinnaanera Royal Arctic Linep eqqumaffigaa. Taamaammat akit nutaamik ilusilerneqarnissaat sulissutigineqarpoq, nunarsuaq tamakkerlugu nalorninartoqarnera sillimaffiginiarlugu aammalu innuttaasumut pitsaanerusussaq pilersuinerullu isumannaatsuunissaa pingaartinneqassallutik.