Royal Arctic Linep nutaanik umiarsualiortitsinera naammassivoq
Nunaqarfiliartaat nutaaq Tilioq Arctica, nutaanik umiarsualiortitsinermi annertuumi 2017-imi aallartinneqartumi umiarsuit kingullersaat, Royal Arctic Linemut ullumi tunniunneqarpoq.
Tilioq Arctica Nunatsinni nunaqarfinnut pajuttaatissatut sanaajuvoq, soorlu Angaju, Aqqaluk aamma Anguteq Ittuk taamatut aamma sanaajusut.
Umiarsuaq nutaaliaasunik atortulersugaavoq nutaaliaasumik motooreqarluni orsussamik atuinikinnerulluni, tamatumalu saniatigut sarpiata ruujoritaa uuliartertagaanngilaq compositimik immikkut ittumik sanaajummat imaanit nillorsaateqarluni.
Umiarsuarmi inuttat arfiniliusut aamma pitsaanerusunik atugassaqartinneqassapput ineeqqaminni namminerisaminnik perusuersartarfeqarlutillu uffartarfeqassallutik.
”Ukiut marluk iluanni umiarsuit nutaat arfinilissaata tunniunneqarneranik angusaqarnerput tulluusimaarutigaarput. Piffissammi taama sivikitsigisup iluani umiarsuaatitsinnik taarsersuineq taama annertutigisoq suleqataasunit tamanit nukippassuarnik eqaatsumillu suliaqarnissamik pisariaqartitsiffiusimavoq. Umiarsuit atulernissaannut ukiorpassuarnilu nunatsinni iluaqutigilluarnissaannut qilanaarpugut”, Umiarsuarnik ingerlatsivimmi pisortaq, Anders Bay Larsen, oqarpoq.
Tilioq Arctica Narsami aggustip qaammataani pisortatigoortumik atserneqassaaq.