Royal Arctic Linep pisortaqatigiinni assigiinngisitaartuuneq annertusarpaa
Royal Arctic Linemi siulersuisut aalajangerput ingerlatseqatigiiffimmi pisortaqatigiit annertusiniarlugit, aqutsisoqatigiit tamarmiusut januaarip aallaqqaataani 2022-mit atuutilersumik pisortaqatigiinnut ilanngunnerisigut.
Nunatsinnut Nunatsinniillu imaatigut assartuinerup attaveqatigiinnut ammasunut ilanngunneqarnissaa ingerlatseqatigiiffimmi pisortaqatigiit ukiuni kingullerni arfinilinni siunnerfilimmik sulissutigaat. Tamannalu maanna timitalerneqareerpoq. Attaveqatigiit ammasut kiisalu Nunatsinnut eqqussuinermut avammullu nioqquteqarnermut periarfissat pilersinneqartut atorluarnissaannut maanna piffissanngorpoq, tamannalu suleqatigiinnermik, pisariillisaanermik pitsanngorsaanermillu annertunerusumik pisariaqartitsiffiuvoq. Nunarsuatsinni pissutsit allanngoriartornerat sukkatsikkaluttuinnarpoq, ingerlatseqatigiiffiillu ineriartornermut tunngatillugu naleqqussarnissaat ullut tamaasa annertusiartuinnarluni, taamatuttaarlu aarlerinaateqarsinnaasut assigisaanik aamma annertusiartorput.
Tamatumalu isumaginissaanut aqqutissat ilaat tassaavoq pisoqatigiinni qullersani assigiinngisitaartuunerup qulakkeerneqarnissaa.
Pisortaqatigiinni ilaasortat nutaat tassaapput:
- Umiarsuarnik ingerlatsinermut pisortaq: Anders Bay Larsen
- Suliffeqarfissuarmi Sulisoqarnermut pisortaq/CHRO: Bebiane Boye Hansen
- Tuniniaanermut pisortaq/CCO Niels Clemensen
- Ingerlatsinermut pisortaq/COO Ivalu Kleist
Direktøritut pisortanngortinneqartut sisamaasut januaarip aallaqqaataa 2022 aallarnerfigalugu pisortaqatigiit tamarmiusut ilagilissavaat uku peqatigalugit - Aningaasaqarnermut pisortaq/CFO Peter Christoffersen
- Pisortaanerup tullia/Deputy CEO Aviâja Lyberth Lennert
- Pisortaaneq/CEO Verner Hammeken
”Pisortaqatigiinni annertusaaneq ineriartortitsineruvoq pitsaalluinnartoq. Ulluinnarni aqutsisuusut pisoqatigiinnut ilanngunneqarnerisigut aqutsisoqarnikkut ataqatigiissitsissaagut, piffissaq ungasinnerusoq pillugu aalajangiussatsinnut ikorfartuisussamik akisussaasuusussamillu. Pisortaqatigiit sulisullu akunneranniittup peerneratigut ataatsimoornissaq qulakkeerluarsinnaanerulissavarput, pisortaqatigiinnilu ataatsimoorluni pilersitseqatigiittarneq pitsaanerusoq angusinnaallugu, pingaartumik eqimattat pineqartut taama assigiinngisitaartigitillugit, ukioqqortussutsimut/misilittakkanut, suiaassutsimut tunuliaqutigisanullu tunngatillugu, aammali suliaqarfigisamut tunngatillugu” Verner Hammeken taama oqarpoq.
Siulersuisuni siulittaasoq Ulrik Blidorf ima oqarpoq: ”Siulersuisut pisortaqatigiit annertusarnissaannik aalajangiipput ingerlatseqatigiiffiup attaveqatigiinni ammasuni siunissami suliassarilerumaakkaminut nukittunerusumik inissisimanissaa anguniarlugu. Pisortaqatigiit amerlassutsimikkut kikkunnillu inuttaligaanermikkut allanngortinneqanngillat, allannguinerli ingerlatseqatigiiffiup pitsaasumik ineriartornerata ingerlatiinnarsinnaanissaanut annertuumik sunniuteqassaaq. Pisortaqatigiit nutaat suleqatiginissaannut siulersuisut tamarmiusut qilanaarput”.