Allannguutit iliuuseqarfiginissaannut nukissaqarpugut

Nunatsinni attaveqaasersuutitigut aningaasalersuinerit annertuut malitsigisaannik ingerlatat annertussusiat ukiup affaani siullermi qaffariarpoq. VSA-mullu atatillugu umiarsuarnik imarpikkoortaatinik anginerusunik atuilernermi sapaatip akunneranullu aalajangersimasumik ingerlaartalernermi naammassisaqarsinnaassutsip annertusineqarneratigut Royal Arctic Line tamatuma kingunerisaanik naammassisaqarsinnaassutsip killilerneqarneranik nalaataqanngilaq. Inuiaqatigiinni ingerlatanik ikorfartuisinnaanerput taamaalilluni siornatigumut naleqqiullugu annertuupilussuarmik pitsanngoriaateqarpoq, siornatigummi pisariaqartitsineq naammassiumallugu umiarsuarnik allanik attartornissaq pisariaqartarsimammat, tamatumalu kingunerisaanik aningaasartuutit aamma amerlanerusarsimallutik.

Tamannalu ilaatigut pissutigalugu Royal Arctic Linep assartuinermut akit aalajangiusimaannarsinnaasimavai, umiarsuarnullu nutaanut annertuupilussuarmik aningaasalersuisoqaraluartoq nunarsuarmilu niuerfinni aningaasat naleerukkiartoraluartut assartuinermut akit 2015-imi upernaakkulli allanngortinneqarsimanatik.

Naammassisaqarsinnaassutsip Islandip Skandinaviallu akornanni niuernikkut atorluarneqarnissaa kissaatigisatsitut suli ineriartorfiunngilaq. COVID19-ip kingunerisaanik nalorninartoqarnera killilersuisoqarneralu pissutigalugu aallartisarniarneq naatsorsuutigisamit arriinnerusimavoq, niuerfillu maanna pisoqarfiuleraluartoq ingerlatamit tamatuminnga 2021-mi angusassatut naatsorsuutigineqartut naatsorsuutigisamit annikinnerussapput.

COVID19-imut tunngatillugu killilersuinerit inuttat taarsernerinut atatillugu malunnaatilimmik aningaasartuuteqarnerunermik aamma kinguneqarput, inuttat mattusimagallartariaqartarnerat angalanissamullu periarfissat ilaanneeriarlutik killeqartarsimanerat pissutigalugit. Aningaasartuutit Corona pillugu killilersuinernut tunngasut ukiup naatsorsuuseriffiusup naanerani inaarutaasumik naatsorsorneqassapput, taamaattumillu ukiup affaani siullermi missiliuinermut tunngatillugu nalorninartoqarnera annertuvoq.

Islandimik niueqateqarneq ukiup affaani siullermi 60%-inik qaffariarpoq, tamannalu niueriaatsit allanngoriartulernerinut ersiutaavoq, Royal Arctic Linellu Islandimi DHL Liner Agencymik suleqateqarnermigut tamanna sapinngisamik pitsaanerpaamik tapersersorniarpaa.

Ukiup affaani siullermi angusat kissaatigisatsinnit annikinnerupput, naammagisimaarnartutulli nalilerneqarlutik. COVID19-ip sunniutai teknikkikkut aaqqissuussaanikkullu iliuuseqarnikkut iluarsiiffiginiarneqassapput, niuerfiillu nutaat immikkut aallutarineqaannassapput ingerlatseqatigiiffimmut taamatullu aamma Nunatsinnut siornatigut takuneqarsimanngitsumik iluanaaruteqartitsisinnaammata, taamaaliornikkullu assartuinermut akit qaffannginnissaannik kissaateqarnitsinnut aamma sapinngisamik  ikorfartuisinnaassallutik.