Sulisitsisut marsip 8-ni 2021 isornartorsiuteqarnerannut paasissutissanut naqqiut

Sermitsiaq.AG-kkut allaaserisami marsip arfineq-pingajuaneersumi qulequtaqartumi ”RAL qaqugu akikinnerulissava?”-mi Sulisitsisuni pisortap Christian Keldsenip oqaatigaa Sulisitsisuni ilaasortat Royal Arctic Linep Eimskipimik suleqateqalernerata tamatumalu malitsigisaanik ingerlaarfiit ilusiligaanerisa allannguuteqarnerata kingorna pitsanngoriaatinik takusaqarsimanngitsut. Killormoortuanilli misigisaqarsimasut.

Sulisitsisut pisortaat naapertorlugu akigititat inuiaqatigiinni akit qaffakkiartortut ataateqqagaluaraat (Royal Arctic Linemi assartuinermut akinik 2015-imiilli qaffaasimanngimmat) sullitat misigisarpaat  akiligassiissutigineqartartuni aningaasartuutit allat ilanngussuunneqartartut, tassungalu atatillugu aningaasalersuinermut tapiliussaq uuliamullu tapiliussaq innersuussutigalugit.

Eqqortorli tassaavoq aningaasalersuinermut tapiliussaq 2011-mi akuersissutigineqarlunilu atuutilersinneqarmat, taamaattumillu ukiuni qulini ilisimaneqareerlunilu allannguuteqarsimanngimmat.

Uuliamut tapiliussamut uuliamik niuerfimmi akit apeqqutaajuaannarput nunarsuarmilu uuliamut akit qaffasinnerunerat pissutigalugu uuliamut tapiliuttagaq marsip aallaqqaataani 2021-mi atuutilersumik -3 procentimit +3 procentimut qaffaavigineqarpoq, tassalu 6 procentpointinik naleqqussarneqarluni. Uuliamut tapiliuttagaq kingullermik juulimi 2020-mi naleqqussarneqarpoq, tapiliuttagaq uuliamut akit appasinnerisa kingunerisaannik +6 procentinit -3 procentinut appaavigineqarmat, tassalu 9 procentpointinik naleqqussarneqarluni. Uuliamut akit allannguuteqaqqissagaluarpata, qummut ammulluunniit, taava uuliamut tapiliuttagaq naleqqussaqqinneqarumaarpoq.

Aalborgip, Århusip Reykjavikkillu akornanni assartukkat ilaannut akigitinneqartut assigiinngissuteqarnerat Royal Arctic Linep nassuerutigaa, containerinut nalinginnaasunut assigiinngissut 3 aamma 5 procentit akornanniippoq nassiussanullu tamalaanut assigiinngissutaasoq 14%-iulluni, assartukkanulli nillataartitanut qerisunullu assigiinngissuteqanngilluinnarpoq (tassalu 0%). Tassa imaappoq Sulisitsisut pisortaata innersuussutigisaatut 110 procentinik akisunerunngilaq. Reykjavikkimi nassiussalerinermut akit nassiussanut aalajangersimasumik kissassuseqartitanut tunngatillugu 2020-mi apparneqarput. Taamaammat akisunerulertoqarani killuanik pisoqarpoq. Royal Arctic Line Aalborgimi umiarsualivimmut tunngatillugu aalajangersimasunik aningaasartuuteqartillugu akit Århusimi qaffasinnerulaartuassapput Århusimut immikkut tapiliussaqarnera pissutigalugu, Royal Arctic Linellu Danmarkimi umiarsualiviit marluk aqqusaartarunnaarpagit tapiliussaq taanna peerneqassaaq.

Aalborgimit Reykjavikkimiillu qerisunik nassiussat akiisa assigiilluinnarnerisa saniatigut, nuussinernut piffissartornerup sivikinnerulernerata sapaatit akunnikkuutaartumillu aqqusaartoqartarnerata iluaqutissartaa Sulisitsisunit immikkut erseqqissaatigineqanngilaq.

Royal Arctic Line Islandip Nunattalu akornanni assartuinermut akinik appaasinnaassappat Skandinaviap Islandillu akornanni inissamik tunisaqarnissaq pisariaqarpoq, tamanna imarpikkoortaatit Skandinaviap Nunattalu akornanni angalatinneqarnerinut aningaasartuutinut piffissap ingerlanerani matussutigineqarsinnaassammat. Tamannalu maanna periarfissaalerpoq, umiarsualiviit Skandinaviap Islandillu akornanni angalanissamut niuernikkut tunngavissaqartut tikittaleratsigit.

Royal Arctic Linep siornatigumut naleqqiullugu umiarsualivinnut amerlanerusunut maanna attaveqalerneratigut, sullitavut Nunatsinnut Nunatsinniillu aqqutissat amerlanerusut atorlugit nassiussinissamut periarfissaqalersippagut. Sullitavullu nassiussanik sullissisup ingerlatitseqqiisartup attaveqarfiginissaanut periarfissaqalerput, Royal Arctic Linep sullissisutut Nunatsinnut Nunatsinniillu assartuineq isumagissavaa, nassiussanillu sullissisup aqqutissat allat isumagalugit. Tamannalu allagaatinik amerlanerulersitsisussaanngilaq.

Royal Arctic Linemi isumaqanngilagut aallartiaarpallaarsimalluta. Sullitavut aqqutit nutaat atorlugit Nunatsinnut Nunatsinniillu nassiussinissamut periarfissaqarnissaat sulissutigileruttorparput. Attaveqaasersuutit inissinneqareersutut oqaatigineqarsinnaapput, alloriarnerillu tullissaat tassaavoq uagut sullitattalu toqqammavissap nutaap pilersitaanik periarfissanik nutaanik nassaartornissarput taakkulu atorluarlugit.

Paasissutissat sukumiinerusut pisortaanerup tullianut Aviâja Lyberth Lennert-mut attaveqarnikkut pissarsiarineqarsinnaapputMobil: +299 58 57 47 imal. mailavll@ral.gl