Royal Arctic Linemi pisortaqatigiit siunissaq piareersarfigaat
Royal Arctic Linep ingerlaarfinnut aaqqissuussinera maanna eqaannerulerpoq Nunatsinnullu Nunatsinniillu attaveqarfissanik nutaanik pilersitsiniarnermi aamma nutaanik periarfissaqalerluni.
Taamaammat pisortaqarnikkut nukiit maanna aaqqiissuteqarfigineqarput nunani tamalaani niuerfinni ammasuni amerlanerusunilu niuernikkut ingerlatat annertusarnissaannik pisariaqartitsineq iliuuseqarfiginiarlugu, tamatumunngalu peqatigitillugu niuernikkut periarfissat nutaat aamma qulaajarneqassallutik. Aamma Suliffeqarfissuarmi Sulisoqarnermut pisortatut atorfik inuttaleqqinneqarpoq ingerlatseqatigiiffiup sulisuinik sulisoqarnermilu ingerlatseriaatsinik ineriartortitseqqinnissaq qulakkeerniarlugu.
Tuniniaanermut maanna pisortarisatta CCO (Chief Commercial Officer), Lars Borris Pedersenip, Royal Arctic Linep avataani nutaanik unammilligassarsiorniarluni toqqarpaa. Lars sullitanik kiffartuussivimmut, inniminniisarfimmut, assartugassalerivimmut, Key Account Managementimut tuniniaanermullu pisortatut atorfeqarnermini ingerlatseqatigiiffiup allanngortiterinerani ingerlatseqatigiiffik siulersorluarsimavaa, pingaartumik ukiuni kingullerni arfinilinni. Ikittuinnaat Lars kinaanersoq nalugunarpaat Larsilu Royal Arctic Linemi ukiorpassuarni sulisimaneranut qutsavigaarput atorfeqarnermigullu ingerlaqqinnerani pitsaanerpaanik kissaapparput.
Tamatuma malitsigisaanik aaqqissuussaanermi tuniniaanermut sullitanullu tunngasunut suliaqarfinni pisortaqarnikkut allannguisoqassaaq.
Nunarsuarmut akuujartuinnarnerup niuernikkullu ineriartortitsinerup annertusinerata malitsigisaanik Royal Arctic Line ilisimaneqarluareersunik aaqqissuusaanermi atorfinitsitseqqippoq. Niels Clemensen aggustip aallaqqaataani atuutilersumik CCO-tut nutaatut Vice Presidentitullu atorfinitsinneqarpoq. Niels Hanstholm Havnimi pisortatut atorfimmeersuuvoq, Royal Arctic Linemi 2016-imi atorfeqarunnaarami tassani atorfeqalerpoq. Niels Royal Arctic Linemi siornatigut CCO-tut atorfeqarsimavoq ingerlaaqatigiinnissamullu iliuusissatut pilersaarut 2015/2016-imi ilusilersueqataaffigisimallugu. Niels taamaalilluni maanna angalanitsinni nivariarneq siulleq peqataaffigisimavaa nunanilu tamalaani misilittagaqarnermigut Nunatsinnilu pissutsinik ilisimasaqarnermigut periarfissanut tullinnguuttunut ingerlatissavaatigut. Niels atorfininnerminut atatillugu ima oqarpoq: ”Nuliaralu Nuummut uternissatsinnut qilanaarpugut, uangalu nammineq Royal Arctic Linemi unammilligassat suliassallu pissanganartut Royal Arctic Linemi suleqatit sinneri peqatigalugit naammassiniagassat qilanaaralugit ”.
Sulisoqarnermut tunngatillugu aamma nuannaarutigalugu nalunaarutigissavarput Royal Arctic Linemi Suliffeqarfissuarmi Sulisoqarnermut pisortaq nutaaq / CHRP aggustip aallaqqaataani 2021-mi atorfimmini aallartissammat. Atorfik pisortaqatigiinni qullersani inissisimasoq Bebiane Boye Hansenimik inuttalerneqassaaq. Bebiane Nukissiorfinni atorfimmeersuuvoq Sulisoqarnermullu suliaqarfimmi aaqqissuussaanikkut annertuumik ilisimasaqarnermi saniatigut ingerlatseqatigiiffimmi pilersuinermik suliaqarfiusumi pingaarutilimmi allami Nunarput tamakkerlugu sulisoqartumi misilittakkani pitsaasut nassassavai. Bebianep Sulisoqarnikkut ingerlatsinermi suleriaatsinik, tassungalu ilanngullugit qarasaasiatigut misilitsinnerup inerneri tunngavigalugit sulisoqarnikkut ingerlatsineq ingerlatseqatigiiffimmi sulisunut tamanut atorfeqarnikkut qaffassarnissamut ineriartornissamullu periarfissat pilersinneqartut annertuumik suleqataaffigissavai. Bebiane ima oqarpoq: ”Kalaallit Nunaata ajornannginnerusumik niueqatigineqarsinnaanngortinnissaata suleqataaffiginissaanut sulisullu tamaasa naapinnissaannut qilanaarpunga. Sulisoqarnikkut sakkussat ukiuni kingullerni tallimani qarasaasiatigut misilitsinnerup inerneri tunngavigalugit sulisoqarnikkut ingerlatsineq tunngavigalugu ineriartorteqqinnissaannik suliap ingerlateqqinnissaanut qilanaarpunga, sinerissami, Nunatsinni qullersaqarfimmi Danmarkimilu sulisutsinnut sulisoqarnikkut suliniutitta sapinngisamik annerpaamik sunniuteqarnissaat qulakkeerniarlugu”.