Nunaqarfiliartaat nutaaq Uummannami atserneqassaaq

Umiarsuaatileqatigiiffiup umiarsuaataataasa ilaat, nutaanerpaaq Maleraq Arctica, juulip ulluisa 16-ianni 2021 Uummannami atserneqalerpat illoqarfiup umiarsualiviani nalliuttorsiornissamut Royal Arctic Line Uummannami innuttaasunik qaaqqqusivoq.

Maleraq Arcticamik atsiisussaq Uummannami Meeqqat Angerlarsimaffianni meeqqanut inuusuttunullu isumassuillunilu toqqissisimanermik tunniussilluni ukiorpassuarni sulisimavoq:

Louise Zeeb – Meeqqat Angerlarsimaffiat, Uummannaq

Uummannarmiu 78-inik ukiulik Louise Zeeb Maleraq Arcticamik, maanna suliffissamini, tassa Uummannami nunaqarfiinilu pajuttarluni sulilereersumik, atsiisussatut toqqarneqarpoq.

Louise Zeeb Qaarsuni inunngorsimavoq, Uummannamilu Meeqqat Angerlarsimaffianni 1959-imili sulisimavoq. Ukiorpassuarni tunniusimalluni sulisimanerminut Louise Zeeb 2001-imi Nersornaammik sølviusumik tunineqarpoq.

Louise Zeeb Nersornaammik tunineqarmat taamani Inatsisartunut siulittaasuusoq ilaatigut ima oqaaseqarpoq: - Isumassuinikkut inuppalaartuunikkullu meeqqanut toqqissisimanermik tunniussiuarsimavutit allaallumi meeqqanit aanaamik aanaajaamillu taaneqartarlutit, meeqqanut Meeqqat Angerlarsimaffianni najugaqartunut najugaqarsimasunullu qanilaartuuninnut tamanna takussutissaavoq. Meerarpassuit mikisunnguuneranniit inersimasunngornerannut malittarisarsimavatit, soorlu aamma innartitsisarnikkut, tussiarfiginnittarnikkut biibilimillu atuffassisarnikkut isumassuisarninni pisariaqartitaannik tunisarsimagitit. Meerarpassuarnut Nunatsinni sumiiffinni assigiinngitsuneersunut anaanaasutullusooq inissisimasarsimavutit.

Royal Arctic Linemi sulisutta ineriartortuarnissaat kissaatigaarput, tamanna taakkununnga, ilaqutaannut, suliffeqarfimmut Nunatsinnilu inuiaqatigiinnut iluaqutaassammat. Taamaattumik Nunatsinni inuiaqatigiit ineriartornissaannik eqqartuisoqartillugu inuttut naleqartitat pingaartillugit ilanngunneqartarnissaat kissaatitsinnut ilaavoq. Inuttut, inuiaqatigiittut ilinniakkatigullu ineriartornermi tamatta toqqissisimaffiusumik angerlarsimaffeqarnissarput pisinnaatitaaffiuvoq. Taamaattumik nuannaarutigeqaarput Louise Zeeb Maleraq Arcticamik atsiisussatut toqqarneqarsimammat.

Louise Zeeb-ip Maleraq Arctica atsissavaa Uummannap umiarsualiviani naliuttorsiualaarnermi tallimanngornermi juulip 16-ianni 2021 nal. 14:00.

Atsiinerup kingorna Uummannarmiut ”umiarsuaatiminni” takornariartinneqarnissaminnut periarfissinneqassapput, umiarsualivimmi kaffillernerup nipilersornerullu nal. 17:00-ip tungaanut ingerlasussap nalaani.