Aallaavittut umiarsualiveqarneq pillugu isumaqatigiissutip atorunnaarnissaa Royal Arctic Linep piareersarfigaa

Royal Arctic Linep Aallaavittut umiarsualiveqarneq pillugu Port of Aalborgimut isumaqatigiissutaa 2022-mi atorunnaassaaq. Royal Arctic Line Aalborgimi sulisunut sisamanngornermi decembarip qulingiluaani nalunaaruteqarpoq ingerlatseqatigiiffik 2022-mi ukiup affaani siullermi sulisunik amerlasuunik soraarsitsinissamik kalerriuteqarnissaq januaarimi 2022-mi isumaliutigalugu. Terminalimi, quersuarmi sullivimmilu sulisut 100-t missaanniittut pineqarput.

Aalborgimi sulisut sinneri 40-t missaanniittut, sullitanik kiffartuussinermik, qarasaasialerinermik, sulisoqarnermik, aningaasaqarnermik, umiarsuarnik ingerlatsinermik aamma tuniniaanermik suliaqartut, aallaavittut umiarsualiveqarneq pillugu isumaqatigiissutip avataani inissisimapput taamaattumillu isumaqatigiissutip atorunnaarneranit toqqaannartumik eqqugaassanngillat.

”Allannguinerit annertuut sulisutsinnut eqquigaangata ajuusaarnartuaannarpoq. Iliuusissat isumaliutigineqartut sapinngisamik siusinnerpaamik paasissutissiissutiginiarlugit toqqarsimavarput. Aallaavittut umiarsualiveqarneq pillugu isumaqatigiissutip atorunnaarnissaata malitsigisaanik pissusissamisoortumik nalornissuteqartoqarnera ataqqillugu taamaaliorpugut. Taamatut siusinaarlugu nalunaaruteqarpugut, isumaqaratta 2022-mi januaarip aallartinnerani isumaqatiginninniarnissaq pillugu aggersaanissamut isumaliuteqarnerput sulisunut pitsaanerpaamik piareersarnissamut periarfissiissasoq”, Royal Arctic Linemi pisortaaneq, Verner Hammeken, taama oqarpoq.

Danmarkip Nunattalu akornanni umiarsuakkut nassiussat tamarmik siunissami Århusip umiarsualiviatigut, Danmarkimi containerinut terminaleqarfiit annersaatigut, assartorneqartalernissaat siunertarineqarpoq. Nassiussat nillartaatitat qerisullu Århusikkut maanna isumagineqareerput, nassiussallu sinnerisa tamarmik 2022-p ingerlanerani Århusip umiarsualiviatigut assartorneqartalernissaat aamma siunertarineqarpoq.

”Kalaallit Nunaata tamarmi ajornannginnerusumik niueqatigineqarsinnaanngortinnissaanik anguniagaqarnitsinni periarfissanut pilersunut ingerlaavartumik naleqqussarsinnaanissarput pisariaqarpoq. Royal Arctic Linep nutaamik assartuusseriaaseqalerneratigut Danmark, Sverige, Savalimmiut Islandilu maanna sapaatit akunneri tamaasa aqqusaartalerpagut, tamannalu nunatsinnut eqqussuinermut nunatsinniillu avammut nioqquteqarnermut attaveqarfissanik amerlanerusunik periarfissaqalersitsivoq”, Verner Hammeken taama oqarpoq.

Danmarkip Nunattalu akornanni umiarsuakkut nassiussanik assartuineq 1972-imi Aalborgimut nuunneqarpoq, Den Kongelige Grønlandske Handelip 1776-imi pilersinneqarluni Københavnip Umiarsualivianit assartuussisalernerata kingorna.

 

Paasisaqarnerorusukkaanni attaveqarfissat:

Nunatsinni:
Pisortaanerup tullia, Aviâja Lyberth Lennert
Oqarasuaat +299 34 91 03
Mobil: 58 57 47
Email: avll@ral.gl

Danmarkimi:
Tuniniaanermut pisortaq, Niels Clemensen
Oqarasuaat +299 34 91 11
Mobil +299 55 36 52
Email: nic@ral.gl