Nunarput tamaat peqataatissavarput
2020-mi ukiup affaani siullermi angusat Royal Arctic Linemi pisortaqatigiit naammagisimaarpaat, ukiup taamaalinerani nalinginnaasumik amigartoorutaasartut akileraarutit ilanngaatiginnginnerini DKK -37,3 millioninut annikillisinneqarmata (2019: akileraarutit ilanngaatiginnginnerini -58,0 millionit).
Eimskip peqatigalugu umiarsuarmik atueqatigiinnissamik suleqatigiinneq Vessel Sharing Agreement (VSA) aallarnerlugu Tukuma Arctica Aalborgimit Aarhus aqqusaarlugu Nuummut juunip qulingani aallarmat assartueriaatsimut nutaamut pingaarutilimmik alloriartoqarpoq.
Nunatta tamarmi ineriartortitsinermut peqataatinneqarnissaa Royal Arctic Linep pingaartippaa. VSA-mik aaqqiissuteqarnerup iluaqutissartaata ilaat tassaavoq Nanoq Arctica Tasiilami juulip qaammataani atserneqartoq atorlugu Tasiilap Reykjavik aqqutigalugu sullinneqarnissaanut ukiup naaneranit ammaassinissarput. Tamannalu sullissinerup malunnaatilimmik pitsanngoriaateqarneranik kinguneqassaaq, Tasiilamilu ineriartortitsinissamut periarfissanik pissanganarluinnartunik pilersitsiffiusinnaalluni.
Aqutsinerup tungaatigut suliassat annersaat tassaasimavoq, sulilu taamaalluni, ingerlatseqatigiiffimmut nalorninaateqarsinnaasut ingerlaavartumik annikillisarnissaat, VSA-llu aallartisarneratigut ingerlatsinitsinni nalorninaateqarsinnaasut annikillisinneqangaatsiarput. Assartueriaatsip nutaap, Aalborgip Nunattalu akornanni aaqqiissutaasumut pioreersumut, sullitatsinnillu tamanit ilisimaneqartumut, pitsaanngitsumik sunniuteqannginnissaa maanna qulakkeerniagassaraarput, soorlu aamma Aarhusimit umiarsualivinniillu allanit nassiussanik tigooraanissamik neqerooruteqartalinnginnitsinni assartueriaatsip nutaap – suleqatigiinnermilu nutaami ataqatigiissaarinissamik ilinniagassatta – ingerlalluarnissaat tamakkiisumik qulakkeeqqaarusukkipput. Maannamut ajunngitsumik ingerlavoq, aamma pilersaarutit malillugit aallartisarnissamut isumallualersitsivoq.
Royal Arctic Line A/S-ip umiarsuaatai taarsersorneqaleruttorput. Maannamullu nutaanik umiarsualiortitsineq, kiisalu Nuummi umiarsualivittaamut IT-mullu systemimut aningaasaliinerit suliffeqarfiup iluani aningaasalersorneqarput, akitigut qaffaasoqaranilu sullitat kiffartuunneqarnerinut ajorseriaateqarani. Tassungalu ilanngullugu imarpissuakkut assartuussinerup assigiissarneqarnissaanik iliuusissaq iluaqutigalugu Nunatta avataani umiarsualiviit attaveqarfiillu amerlanerusut atulernerisigut kiffartuussinerup qaffasissusiata annertusinera malunnaatilimmik periarfissaqalersitsissaaq.
”Pisortaqatigiit VSA-p ingerlanneqarnera tamakkerlugu sullitat siornatigumut naleqqiullugu ajornerusunik atugaqalinnginnissaat tunngavigalugu sulipput. Tamatuminngalu tunngaveqarluta sulinitta suli attanneqarnerata uppernarsarsinnaanera naammagisimaarparput kiffartuussinikkullu pitsanngoriaatissat nassuiarneqartut assartueriaatsimut siornatigut atorneqartumut naleqqiullugu nalittorsaataaginnassammata. Tassalu akitigut qaffaasoqanngilaq, piginnittunit aningaasaleeqqittoqanngilaq ingerlaarfiusimasullu ajorseriaateqarfiunatik”, Aningaasaqarnermut pisortaq Peter Christoffersen taama oqarpoq.
Corona ilungersunartorsiortitsigaluartoq sanaartornermik suliniutinut pisattanillu attartuunik pisiortortoqarneruneranut atatillugu assartukkat annertupput, tamannalu Coronap toqqaannartumik toqqaannanngikkaluartumillu sunniutigisinnaasaanik annikillisitsivoq. Tassungalu ilanngullugu oqaatigineqassaaq Royal Arctic Line ingerlatseqatigiiffiummat ukiup qanoq ilinera apeqqutaatillugu annertuumik allanngorarfiusartoq, ukiup affaata aappaani kaaviiaartitat qaammatinut siullernut arfinilinnut naleqqiullugit nalinginnaasumik 30 procentinik qaffasinnerusarlutik. Pingaarnerpaarli tassaavoq ingerlatsinermi aningaasat ingerlaarnerisa naammaginartuunerat ingerlatseqatigiffiullu allanngortiterinermini piareersimalluarnera.
Coronamut upalungaarsimanerup sulisunit tamanit malilluarneqarnera, suleriaatsiminnik allanngortitsisimanerat, suliassanik angerlarsimaffimminnit naammassisaqarsimanerat inuttanillu taarsiisarneq unammillernartoqaraluartoq naammagittarluarsinnaasimanerat Royal Arctic Linemi pisortaqatigiit tulluusimaarutigaat. Taamaaliornikkut aamma uagut Royal Arctic Linemi sillimanissarput tamanit peqataaffigineqarpoq, taamatullu aamma pilersuinerup tatigineqarnera attatiinnarneqarluni.