Royal Arctic Linemi sulisoq COVID19-imik tunillanneqartoq

Umiarsuaatileqatigiiffik sapaatiummat ilisimatinneqarpoq inuttat ilaat umiarsuarmit ungasinngitsukkut niusoq COVID19-imut misissortinnermini tunillatsissimasoq paasineqartoq. Umiarsuaq inuttallu sinneri Danmarkimiipput, taamaattumillu virusimik Nunatsinnut nassataqarsimanngillat. Inuttap pineqartup sumiissimanera paasiniarneqareerpoq, malitassallu pisariaqartut tamaasa aallartisarneqareerput.

Royal Arctic Linep Nunatsinni Nakorsaaneqarfik Danmarkimilu peqqissutsimut oqartussat pisup qanoq iliuuseqarfiginissaa pillugu suleqatigai. Inuttat, Nunatta kiisalu Nunatta pilersorneqarnerata isumannaassusia qulakkeerniarlugit malitassat pisariaqartut tamaasa atorneqassapput.

”Taama pisoqarsinnaaneranut upalungaarsareerpugut, assingusumillu pisoqassagaluarpat qanoq iliuuseqarnissamut piareersaateqareerluta. Upalungaarsimaniarnermi pilersaarusiavut maanna atortussanngorpagut, pisullu iliuuseqarfiginissaa sulisutta piareersimaffigereerpaat”, pisortaanerup tullia, Aviâja Lyberth Lennert, umiarsuaatileqatigiiffik sinnerlugu taama oqarpoq.

Pisoq Nunatsinni tunillaassuuttoqarsinnaaneranik allanngortitsinngilaq. Marlunngornermi ullaakkut paasissutissanik amerlanerusunik pissarsinissaq naatsorsuutigineqarpoq.

Paasisaqarnerorusukkaanni attavigineqassaaq Pisortaanerup tullia Aviâja Lyberth Lennert, oqarasuaat 34 91 03, mail avll@ral.gl.