Royal Arctic Line aalajaatsumik ingerlaarpoq

Maannakkorpiaq Royal Arctic Linep imarpikkoortaataa Malik Arctica nioqqutissanik atortussanillu nutaanik nassarluni Kalaallit Nunaata tungaanut ingerlaarpoq.

Pilersuisinnaassuserput aalajaatsuuvoq, aamma piffissami uani COVID-19’ip atuuffiata aallartisarnerani. Kalaallit Nunaatami pilersorneqarnera pingaarutilik illersorniarlugu sapaatit akunnerini siullerni marlussunni upalungaarsimanerput qaffasissisimavoq.

Ulloq siulleq upalungaarsimanermut ataatsimiittartoqatigiinnik, naapillattaartunik, Royal Arctic Line pilersitsivoq, ullumikkullu ingerlatsinerup illersorneqarnissaanut pilersaarutit 25-upput, killiffinnut assigiinngitsunut agguataakkat. Pinaveersimatitsineq ingerlapparput pisinnaasullu amerlanerpaartaat angerlarsimaffimmi sulisillugit, ilaat paarlaattarlutik angerlarsimasarput.

Angerlarsimaffimmiit sulineq ilummut avammullu pitsaasumik paasissutisseeqatigiittarnissamik piumasaqarfiusarpoq – ullormullumi attaveqaqatigiittuarpugut, soorlu aamma umiarsuaatileqatigiiffimmi pisortat qarasaasiatigut ataatsimeeqatigineqartartut, apeqqutit akissutillu eqqartorlugit.

Namminersorlutik Oqartussat Upalungaarsimanermut ataatsimiititaliaata sillimanermut allattorsimaffiutaannut Royal Arctic Line aamma ullut tamaasa nalunaartarpoq, tassani ingerlatsiviup suliassaminik naammassinnissinnaanera pillugu naliliinerit tiguneqartarput.

COVID-19’ip Kalaallit Nunaanni Danmarkimilu atuunnera ullut tamaasa Royal Arctic Linep malinnaaffigaa qanoq iliuusissaminillu naleqqiussisarluni.

Pilersuinerup isumannaatsuunissaa qulakkeerumallugu piffissap ingerlanerani ajornartoorfiup eqquinissaa tunngavigalugu sulivugut ajornartoorfimmilu suleriusissarput pilersaarusioreerlugu.

Assartuinikkut pingaarutilimmik suliaqarpugut, suliassatsinnillu naammassinnissinnaanerput naatsorsuutigineqarsinnaavoq, aamma Kalaallit Nunaanni ulluni artornartuni makkunani. Illoqarfinnut nunaqarfinnullu pilersuineq aalajaappoq, tamanna Royal Arctic Linep oqaatigissallugu pingaartippaa.