Malik Arctica nioqqutissanik nutaanik nassarpoq

Royal Arctic Linep imarpikkoortaataasa ilaat, Malik Arctica, ippassaq pingasunngornermi Aalborgimiit aallarpoq Nuummut Sisimiunullu nioqqutissanik nutaanik allanillu useqarluni. Illoqarfinniit taakkunannga umiarsuit pajuttaatit nunaqarfiliartaatillu illoqarfinnut nunaqarfinnullu pajuttuissapput, ingerlaarnissamut pilersaarutaasut malillugit.

COVID-19’ip siaruaatinnginnissaa anguniarlugu Royal Arctic Linep upalungaartitsinerminut atatillugu aalajangerpaa umiarsuaatimini inuttat umiarsualivinni sulisunut toqqaannartumik attaveqassanngitsut.

Tamatuma saniatigut Nuummi allaffissornermik suliallit amerlanerit angerlarsimallutik sulissapput – paarlaattarlutik – nunatta pilersorneqarnera isumannaatsumik ingerlaniassammat.

Malik Arctica pilersaarutit malillugit marsip 26-ani Nuummut tikissaaq, pilersaarutillu malillugit illoqarfinnut allanut ingerlaqqissalluni.

Umiarsuup sumut killinnera ugguuna malinnaaffigisinnaavat, umiarsuullu aquttarfianiit assi takusinnaallugu (attaviit ajunngikkaangata akunnikkaartumik nutarterneqartarpoq): /skibspositioner/