Royal Arctic Linep Eimskipillu suleqatigiinneq oqaluttuarisaanermut ilannguttussaq aallartippaat

Royal Arctic Linep Islandimilu umiarsuaatileqatigiiffiup Eimskipip ingerlaaqatigiittalernissaat juunip qulingani aallartissaaq Royal Arctic Linep imarpikkoortaataa Tukuma Arctica Aalborgimiit aallarpat.

Ingerlaaqatigiinnissaq juunip qulingani aallartippat aallaqqaammut Tukuma Arctica Eimskipillu pia Dettifoss, atorneqassapput, tassanilu Aalborgiliarnermi Aalborgimiillu aallarnermi tamatigut Reykjavik aqqusaarneqartassaaq.

Eimskipip umiarsuaataa nutaaq Dettifoss Kinami tunniunneqareerluni maanna Europap tungaanut ingerlaarpoq, ingerlaaqatigiinnermullu ilanngutissalluni juulip qaammataani. Eimskipip umiarsuaataata nutaat aappaat Brúarfoss kinguaattooqqavoq aatsaallu oktoberimi piariissangatinneqarluni, taamaalippat ingerlaaqatigiinneq nutaaq tamakkiisoq aallartivinneqassaaq.

Verner Hammeken, CEO, Royal Arctic Linep pisortaanera:

“Sapaatit akunnerinut aggersunut qilanaaqaagut, sullitavut soqutigisaqaqatigiillu allat pisut nutaat pillugit oqaluuttuussinnaanngussagatsigit. Nutaarpassuaqartussaagaluartoq piffissaq aggersoq pisoqqap nutaallu naapiffiattut atorneqassaaq. Allatut sulilernissamut sungiussiartornissarput periarfissaassaaq.

Kisianni Royal Arctic Linemut piffissaq ornitarput soorunami pissanganarpoq eqqamajuagassaassallunilu. Kalaallit Nunaata ukiuni 245-ni ingerlaarfiusimanera allanngortussanngorpoq. Kalaallit Nunaanni assartuinerup iluani periutsit eqaannerusut iserfigisussanngorpagut.

Assartuinikkut aaqqissuussineq nunarsuarmi sumiikkaluaraanniluunniit Kalaallit Nunaata ajornannginnerusumik niueqatigineqarsinnaaneranik kinguneqartussaq. Tassa anguniagaqarput imatut oqaraangatta: “Royal Arctic Line – Kalaallit Nunaat ajornannginnerusumik niueqatigineqarsinnaanngortipparput”, Verner Hammeken oqarpoq.