2019 piffissamik eqquilluarnerpaaffiusoq
Sisamanngornermi maajip 7-anni 2020 Royal Arctic Line ukiumoortumik ataatsimeersuartitsivoq.
Ukioq manna ataatsimeersuarneq allatut ingerlanneqarpoq, COVID-19’ip atuunnerani maleruaqqusat tunngavigalugit peqataasussat ikinnerpaaffimmiitsinneqarmata videokkullu ataatsimiittoqarmat. Ataatsimeersuarneq Naalakkersuisut Facebook-ikkut qupperneratigut aallakaatinneqarpoq,
Ukioq 2019 Royal Arctic Linemut pitsaasuusimavoq. Umiarsualerinikkut naammassisaqarluarfiuvoq iliuusissatullu pilersaarutit malinneqarput.
2019-imi piffissamik eqquutsitsiniarneq qaffasissorujussuuvoq imarpikkoortaatinut sinersortunullu ukiumut 90 procenti qaangersimallugu. Ukiup annersaani silagissuaq atugarput pissutaaqataavoq, aammali umiarsuit ajoqusernerisa ikinnerunerat ingerlaarnissamullu pilersaarusiorluarnerit, soorlu anorersuarnut pulanaveersaarnerit, piffissamik eqquilluta ingerlaarsimanitsinnut pissutaaqataapput.
Taamatut ingerlasimaneq umiarsuaatileqatigiiffiup avataangiisinut artukkiineranik annikillisitsivoq, tassami umiarsuarni orsussamik atuineq
10 procentingajammik annikillimmat. Tamanna umiarsuaatileqatigiiffiup CSR-imut atatillugu nalunaarusiaani www.ral.gl iserfigalugu takuneqarsinnaavoq.
Akileraarutinik ilanngaanani 2019-imi sinneqartoorutit DKK 27,3 millioniupput (2018: DKK 24,1 millionit), taamaalillutillu Royal Arctic Linep ukioq naallugu 5 millionit 15 millionillu akornanniittunik sinneqartoornissaminut naatsorsuutai malunnartumik qaangerneqarput, Royal Arctic Linellu ukioq 2019 nammagisimaarnarluartumik angusaqarfiusimasutut isigaa.
Ingerlatsinerup naammassisaqarfiulluarnerunissaa 2019-imi Royal Arctic Linep aalluteqqippaa Eimskipimillu ingerlaaqateqalernissami periuutsit nutaat piareersarfigalugit.
Eimskipimik ingerlaaqateqalernissamut akuersissut pingaarutilik sivisuumillu utaqqisaasoq Islandimi unammilleqatigiinnermut aqutsisoqarfiup 2019-imi apriilip qaammataani tunniuppaa. Kingornatigut Islandimi umiarsuaatileqatigiiffiup allap aalajangerneq maalaarutigalugu suliassanngortippaa, suliarlu aqutsisoqarfiup umiarsuaatileqatigiiffiullu taassuma akornanniittoq septemberip tungaanut suliarineqarpoq, naammassimmallu apriilimi akuersissut atortussanngortinneqarluni.
Umiarsuit nutaat pingasut 2.150 TEU-it, taakkunannga Royal Arctic Line ataatsimik piginnittuuvoq, Kina-mi Wenchongip umiarsualiorfiani sananeqartut kinguaattoorput. Taamaalilluni VSA-mik tunngaveqarluni suleqatigiinnissaq 2020-mi ukiup immikkoortuata aappaani aallartisarneqartussanngorpoq.
Royal Arctic Line umiarsuarnik nunaqarfinnut assartuutissanik sisamanik nutaanik Spaniami sanatitsivoq, taakku aamma kinguaattoorput, ilaatigut issikkussaat kingusinnerusukkullu COVID-19 pissutigalugit. Umiarsuit Kalaallit Nunaanni pissutsinut tulluarsagaapput, avammullu nioqqutissanik usilersortarnissamut, containerinut palitsinullu, naleqqussagaallutik. Umiarsuit 2020-mi 2021-milu tunniunneqassapput.
Siulersuisut siulittaasuat Ulrik Blidorf:
“Ingerlaarnissaq nutaaq qaammatit marluunngitsulluunniit qaangiuppata aallartittussaasoq tamaanga killiffiup takutippaa Royal Arctic Linep ineriartornera pissanganartorujussuusoq. Nutaarluinnarmut killeqanngiusattumik periarfissalimmut appakaatilerpugut, periarfissallu tamarmik Kalaallit Nunaata nunarsuarmioqataanissaanut pitsaanerusunik aqqutissiuussipput. Ukioq manna ukiumi pitsaasumi suleqatigiissimanitsinnut siulersuisunut qujavunga. Ingerlatseqatigiiffimmi pisortanut, aqutsinut sulisunullu ukiumut pikkunartumut qujanaq. Aamma sullissatsinnut uagutsinnullu soqutiginnittunut, minnerunngitsumillu kisimiillutik piginnittutsinnut, nutaap tungaanut angalanitsinni suliatsinnut annertuumik tapersersuillutillu tatiginninnermik takutitsisimasunut qujanaq”.
2020-mi ataatsimut isigalugu Royal Arctic Linep suliffeqarfissuani tamarmi akileraarutit ilanngaatigereernagit DKK 25 – 35 millioninik sinneqartoornissaq naatsorsuutaavoq.
Ukiumi angusat qimerloorniaraanni ukiumut nalunaarusiaq innersuussutigissavarput www.ral.gl
Paasisaqarnerorusukkaanni Aningaasaqarnermut pisortaq Peter Christoffersen attavigineqarsinnaavoq, oqarasuaat 34 91 30, mail pchr@ral.gl