Royal Arctic Linemut ulloq eqqaamaneqaataajuartussaq
Ullumi ulloq Royal Arctic Linemut Kalaallit Nunaannullu ulluuvoq oqaluttuarisaanermut ilannguttussaq.
Royal Arctic Linep Islandimilu umiarsuaatileqatigiiffiup Eimskipip ingerlaaqatigiittalernissaat ullumi aallartippoq. Taamaalilluni Kalaallit Nunaata ukiuni 246-ni angallavigineqarnera allatut ingerlanneqalerpoq. Umiarsuaatileqatigiiffiup umiarsuaataa nutaanerpaaq ingerlaaqatigiinnermullu atorneqartussaq Tukuma Arctica ingerlaaqatigiinnerup iluani siullerpaamik ullumi Aalborgimi usilersorneqarpoq. Kingorna Aarhusiliassaaq aallaqqissallunilu juunip 12-ianni Reykjavikimut ingerlaassalluni. Nuummut tikissaaq juunip 19-ianni. Kalaallit Nunaata pilersorneqarnerani angallavigineqarneranilu piffissaq nalaataq nutaavik maanna piviusunngorpoq.
Umiarsualivinnut amerlanernut, taamalu ingerlaarfinnut allanut, Eimskipip ingerlaarfii Nunanut Avannarlernut, Europamut USA-mut Canadamullu ingerlasut ilanngullugit Royal Arctic Linep tikittagaqalerneratigut Kalaallit Nunarput nunarsuatta sinnerata tungaaniit niueqatigiuminarnerulissaaq.
Ingerlaaqatigiittarnerup aallartisarnera allatut ajornartumik marlunnut avinneqartariaqarsimavoq Eimskipip umiarsuaaataasa aappaat Brúarfoss Kinami umiarsualiorfimmiit kinguaattooqqammat. Ullumi, Tukuma Arcticap Aalborgimiit aallarnerani, immikkoortoq siulleq aallartippoq, umiarsuillu Aalborgimiit Aalborgimullu ingerlaarnerminni Reykjavik aqqusaartassavaat, soorlu aamma Helsingborg kingusinnerusukkullu Norgemi Frederiksstad tikinneqartarumaartut.
Ingerlaaqatigiinnerup immikkoortuata aappaata aallartinnissaata, oktoberip 28-ianni 2020 aallartissangatinneqartup, tungaanut Royal Arctic Linep imarpikkoortaataa Mary Arctica ingerlaaqatigiinnermi umiarsuit pingajuattut atorneqassaaq. Oktoberip 28-anni Brúarfoss Danmarkimiit aallassangatinneqarpoq, Helsingborgimut, Frederiksstadimut, Aarhusimut, Torshavnimut Reykjavikimut Nuummullu ingerlaassalluni. Taamanikkussamut umiarsuit pingasut Royal Arctic Linep Eimskipillu ingerlaaqatigiinneranni atugassat tamarmiullutik sulilersimassapput.
Verner Hammeken, CEO, Royal Arctic Linep pisortaanera:
“Royal Arctic Linemut piffissaq ornitarput pissanganarpoq eqqamajuagassaassallunilu. Kalaallit Nunaata ukiuni 246-ni ingerlaarfiusimanera allanngortussanngorpoq. Kalaallit Nunaanni assartuinerup iluani periutsit eqaannerusut iserfigisussanngorpagut. Assartuinikkut aaqqissuussineq nunarsuarmi sumiikkaluaraanniluunniit Kalaallit Nunaata ajornannginnerusumik niueqatigineqarsinnaaneranik kinguneqartussaq. Tassa anguniagaqarput imatut oqaraangatta: “Royal Arctic Line – Kalaallit Nunaat ajornannginnerusumik niueqatigineqarsinnaanngortipparput”.