Royal Arctic Linep oqaloqatigiinneq kissaatigaa - sammiveqanngitsumik ingerlatsinerunngitsoq

Nunarsuarmi allanngorarfiusumi tunngaviusumik nikisitsineq

Kalaallit Nunaat ukiuni makkunani annertuumik allanngoriartorfiuvoq. Ilaannaannik taaguissagutta Ilulissani Nuummilu timmisartorsuarnut mittarfiliorpugut, inissiarpassuarnik meeqqerivinnillu ukiuni makkunani sanaartorpugut, attaveqaatitigut atortut pitsaassutsimikkut qaffaavigineqarput maannamut innuttaasut 92 procentiisa sukkasuumik internetseqarnerannik kingulimmik, aalisariutillu nutarteriffiupput.

Kalaallit Nunaata immakkut angallavigineqarnerani matoqqasup iluani uteqattaarnermiit ingerlaariaatsimut ammasumut pisariaqartitsinikkullu allanngorteriaannaasumut allanngortitsineq Royal Arctic Linep nutarterinermut tapersiutigaa. Ingerlaariaatsip taama ittup nunarsuup sinnerani sumiikkaluaraanniluunniit Kalaallit Nunaata toqqaannartumik niueqatigineqarsinnaanngorneranik periarfissiivoq.

Suleriaatsimik allannguilluinnarneq tamanna angisuujuvoq. Ukiut sisamat piareersarlugu sulisimanerup naggataatungaa pingaarutilillu tikingajalerparput.

Tamanna ilutigalugu nunarsuatsinni nappaalanersuaq sakkortuumik nalorninartorsiornermik nassatalik misigaarput. Piffissaq taanna tamaat Royal Arctic Line immikkut ittumik sillimasimavoq, Kalaallit Nunaata immakkut pajuttorneqarnerata minnerpaakkulluunniit unitsinneqarsinnaanera pinaveersimatinniarlugu. Immakkut ingerlaartarnerup nutaap naammassiniarneqarnera nalorninernit tamakkunannga aamma eqqugaavoq, suleqatigisatta umiarsuassaat nutaaq kingulleq Kina-mi kinguaattoormat, uagullu Islandimut Islandimiillu kiffartuussinitta nutarternissaanut alloriaqqinnissarput eqqugaalluni.

Alloriarnerit ataasiakkaarpagut

Taamaattumik ingerlaaqatigiinnermi aallartisarnerput immikkoortunut marlunnut avissimavarput oqarlutalu Aarhusimut Islandimullu tunngatillugu nioqqutigisatsinnik ilaartuiniarnata ingerlaariaatsip nutaap siunertatut killiffini aatsaat tikippagu ammaassiniaratta. Aalajangerneq tamanna allanngortinnianngilarput, uagutsinnut suleqatitsinnullu nutaarpassuit suli ilinniagassaammata. Oktoberip naalernerani Royal Arctic Line ingerlaaqatigiinnerup aallartisarnerata immikkoortuata aappaanut killippat nutaaliornerup timitalerneqarnera tamakkissaaq.

Allannguinerit aallaqqaataanni pilliuteqartoqartarpoq

Umiarsuup kingulliup suli tunniunneqannginnera uagutsinnut ilungersuutaasimavoq. Tassami pilersaarut nutaaq malillugu sineriammut pajuttaaterput ataaseq imarpikkoortaatitut atortariaqarsimavarput, umiarsuit pingajuattut. Taassuma atornerani aallarnerit pingasuugaangata ataatsimi nassarsinnaasagut ikinnerusariaqarsimapput tamassumalu nassataanik sinerissami containerinik allersinnaanata. Containerinik amigaateqarneq piviusuusimavoq. Isumaqarpugut unammillikkagut tamakku pillugit Nunatsinniit pisiortortunut pilersuisut ajunngitsumik paasitissimallutigit, nassuerutigissavarpulli juulimi containereqarniarnerput ilungersunarsimammat. Tamannali qaangiutereersimalerpoq. Ajornartorsiutit tamakku ataatsimut isigissagaanni tassaapput ikaarsaariarnerinnarmi atuuttut. Ikaarsaariarneq kisiat tunngavigalugu ingerlaaqatigiinneq nutaaq VSA nalilersussallugu pissusiviusussanut naapertuutinngilaq.

Tamakku saniatigut isumaqarpugut ingerlaariaatsip aallartisarnerata immikkoortuinut siullermut nuunnerput ilimagisatsinniit unammilligassakinnerusimaqisoq. Qularnanngivissumik umiarsualivinnik nutaanik ”misileeqqaarsimanerput”, siullermik umiarsuarmik ataatsimik kingornalu marlunnik, iluaqutaasimasoq, oktober/novemberimi umiarsualivinni nutaani umiarsuit pingasut atorlugit sulilernissatsinnut. Massakkut Aarhus, Helsingborg Reykjavikilu sungiullugit tikittalereerpagut.

Assartugassatigut inissaqartitsineruneq iluaqutigereerparput

Assartugassaqarsimavugut, ilaatigut sanaartukkanut nutaanut atortussanik angisoorujussuarnik, Tukuma Arctica-qanngitsuuppat Dettifoss-eqanngitsuuppalluunniit uagut assartorsinnaasimanavianngisatsinnik. Siornatigornit pisinnaanerulersimavugut.  

Suleriaaseq nutaaq malillugu umiarsuarsuarniit toqqaannartumik sineriammut pajuttussanut ataatsikkut usingiarneq usilersuinerlu Nuummi kusanartumik ingerlassimavarput. Umiarsualiviit nutaat kisitsisinik allanillu paasissutisseeqatigiinnikkut inisseeqatigaavut. Suleriaatsit atulereerpagut.

Soorunami suli pitsanngorsagassaqarpoq, soorlu tallimanngornermi ullaakkut piaartumik Nuummi niuertarfinnut tunniussisinnaanerit. Qularinngilarput suut tamarmik aaqqeriarpata suleqatigiilluta suleriaasissamik nassaarsinnaassasugut.

Periarfissat nutaat soqutigineqarluarput

Periarfissanut nutaanut soqutiginninnerujussuaq nuannaarutigeqaarput. Aarhusikkut Reykjavikikkullu periarfissat pilersussat nittarsaatissallugit qilanaareqaarput. Ajunngitsumik tiguneqarumaarnerat qularinngilarput. Taamaattumik umiarsualiviit nutaat tikittalereeraluarlutigit taakkunannga aallaqqaammulli kiffartuussinissamik neqerooruteqannginnerput pillugu pakatsisoqarsimanera paasisinnaavarput.

Angusaqarfiusumik oqaloqatigiinnerup pisariaqassusia

Ukiut ingerlanerini nutaaliorniarnerput pillugu isornartorsiorneqartarsimavugut. Tamakku tamatigut tusaaniartarpagut, pingaartumik toqqaannartumik sullissatsinneersuugaangata. Nalinginnaasumik tunngavissaqartarput, suliamut attuumassuteqarlutik ilinniutaasarlutillu. Pingaaruteqarpormi pitsaanerusumik suliarisinnaasagut pillugit toqqaannartumik oqaloqateqarsinnaasarnerput.

Isornartorsiuinerit tusagassiuutitigut soqutigisaqaqatigiillu soorlu GE aqqutigalugu saqqummiunneqartut paaserpiarneq ajorpagut. Taamatut avammuinnaq isornartorsiornerit eqqarsalersittarpaatigut ilumut kukkusimanersugut imaluunniit isornartorsiuineq allarluinnarmik tunngaveqarnersoq.

Taamaattumik Sermitsiap nittartagaatigut Brugsenip isornartorsiuinera ullumi saqqummersoq tunngavissaqarsorinngilarput. Sammiveqanngitsumik ingerlatsisoqanngilaq. Isumaqarpugullu nutarterinerujussuaq ingerlatarput suliaasoq suli ingerlasoq ullormiit ullormut suut tamarmik allanngorfiattut pinngitsoq, ilaatigullu aamma kukkuffiusinnaasoq.

Kisermaassiffiit angusaqarfiulluartumik suliffiusinnaapput

”Kisermaassisup” Royal Arctic Linep inuussutissarsiornermik ingerlatallit pitsaanerusumik sullikkumanngikkai oqaatigineqarpoq. Inuussutissarsiortut pitsaanerpaamik periarfissaqarnissaat Royal Arctic Linep anguniagaraa. Inuussutissarsiortunut ammasumik ingerlaariaatsimut naleqqussarsinnaasunut, taamalu Kalaallit Nunaata toqqaannartumik nunarsuarmiunit angusaqarfiulluarsinnaasumik niueqatigineqarsinnaaneranik takunnissinnaasunut, iluaqutissat imaaginnarput. Isumaqarpugut tamanna Kalaallit Nunaanut tamarmut iluaqutaassasoq. Aamma Brugsenimut iluaqutaassaaq, periarfissat atorluarusussappagit. Nuannaassaagut Brugseni sammiveqanngitsumik ingerlatsineraanermut ilassarsiorani suleqatigiiffimmik pissarsinarfiusumik atuiniarluni akuersaartuuppat.

VSA-mimi anguniagaavoq Kalaallit Nunaata anguneqarsinnaaneranik ammaassineq, nammineq aningaasalersukkanik nutaanik, nikeriarnissamut mattussisunik, pilersitsiortornani. Danmarkimi piffissami sivisuumi susinnaajunnaarsilluta aalajangersimasumik umiarsualivilersornata aaqqiissutissanik nassaartorsinnaavugut. VSA-p isumaa tassarpiaavoq kisermaassinerup iluani sullissilluarnerunissamik anguniagaqarluni suleqateqarneq. Kisermaassineq unammillerlugu sulisugullu ineriartortillugit. Allaat ingerlatsinermut aningaasartuutit aningaasaliissutillu ikinnerusut atorlugit. Ukiup affaanut nalunaarusiassatsinni tamakku atuaqqullugit kajumissaariinnassaagut.

Pitsanngorsaarusussuseqarneq allannguerusussuseqarnermik piumasaqarfiuvoq

Oqaatigineqareersutut VSA-mik isumaqatigiissut tassaavoq Kalaallit Nunaata pilersorneqarnerata oqaluttuassartaani nutarterineq maannamut anginerpaarpaaq. Allannguineq taama angitigisoq pisinnaanngilaq piffissap ilamininnguaniluunniit nalorniffiunngitsumik, maannakkorpiarlu Coronap atuunnerani pissutsit pitsaanerulersitsinngillat.

Sullitatta ataasiakkaat tamarmik immikkut nalilissavaat unamminartut tamakku aqqusaarlugit Kalaallit Nunaata toqqissisimasumik qaangiinissaa peqataaffigiumanerlugu, aqqulluunniit alla atorumanerlugu.

Tusagassiuutit aqqutigalugit appisaluussinerup iluaqutissai Royal Arctic Linep takujuminaatsippai, kukkusumillu inerniliinerit pillugit naqqiissuteqartariaqarnermut nukitta atornissaat isumassaqartinnagu. Royal Arctic Line taamatut appisaluussinermut peqataanngisaannassaaq, neriuutigiinnarluguli sullitatta siunissami oqaloqatigiinneq toqqassagaat, piffissami kingullermi ineriartorneq nuanninngitsoq peqataaffiginagu. 

Royal Arctic Line

Aggustip 11-at 2020