Nanoq Arctica Tasiilami atserneqarpoq

Royal Arctic Linep umiarsuaata nutaajunersaat, Nanoq Arctica, Tasiilap umiarsualiviani persuarsiutigineqarluni ullumi nal. 14.00 pisortatigoortumik atserneqarpoq.

Atsiineq tivanermik aallarnerneqarpoq erinarsoqatigiillu Inngeratsiler erinarsorput.

– Nanoq Arctica umiarsuarni anginerpaanngilaq. Nanoq Arcticali tikittagassaminut annertuumik pingaaruteqarpoq. Pingaaruteqassusialu usiinit angineroqaaq. Nanoq Arcticami takorluukkanik aamma nassataqarpoq. Ineriartornissamik, periarfissanik nutaanik piffiillu nutaat pillugit takorluukkat, ingerlatsinermut pisortaq Ivalu Kleist ammaalluni oqalugiarami ilaatigut taama oqarpoq.

Tamatuma kingorna atsiisoq Debo Mikaelsen oqaaseqarpoq:

– Nanoq Arcticamut neriuutigaarput suleqatigiinneq annertooq, tassaammammi nukissamik tunisisussarput. Qatsungasumi mallersumilu angalalluarna. Atserpakkit Nanoq Arctica.

Umiarsuarmik atsiisup Debo Mikaelsenip umiarsuaq champagnemik kusanartumik poortorsimasumik umiarsuup saneraanut kuillugu atserpaa, puiaasarlumi pissusissamisut aserorpoq. Tamatuma kingorna umiarsualivimmi Tasiilami innuttaasunut tamanut ammasumik kaffillertoqarluni kaagillertoqarpoq nipilersortunillu aamma aliikkusersuisoqarluni.