Tukuma Arctica ullumi atserneqarpoq

Royal Arctic Linep tulluusimaarutaa, imarpikkoortaat Tukuma Arctica, ullumi nal. 11:30 inuit ikittunnguit peqataaffigisaanni taamaattorli nalliuttorsiorpaluttumik persuarsiornartumillu Nuummi Qeqertani pisortatigoortumik atserneqarpoq.

Umiarsuarmik atsiisoq Jette Larsen siuttoralugu qaaqqusat ikittunnguit tummarfissakkut aappaluttukkoorlutik umiarsuup eqqaanukarput, umiarsuarmilu inuttaasut – ulluni makkunani coronap atuunnerani umiarsuarmiit nioqqusaanngitsut – umiarsuarmi kusanartumik tulleriiaassimapput.

- Silarsuaq nutaaliaasoq kikkut tamarmik atassuteqarfigisaat inuuffigaarput, ineriartortitsinissamullu siumukarnissamullu pitsaanerpaanik atugassaqartitsissagaanni atassuteqarnissaq allannguisinnaassuseqarnissarlu pisariaqarput. Tamannarpiarlu Tukuma Arcticap suliassaata pingaarnersarissavaat. Tukuma Arcticap siunissami atornerani nunarsuup sinnerani toqqaannartumik niueqateqarnissamut Nunarput ammaatissavarput, pisortaanerup tullia Aviâja Lyberth Lennert tikilluaqqusilluni ilaatigut taama oqarpoq. Tamatuma kingorna atsiisoq Jette Larsen tullinnguupoq:

- Inuttatit imaatigut isumannaatsumik angallakkigit. Atit tulluusimaarutigissavat. Atserpakkit: Tukuma Arctica, Jette Larsen, 1992-imi Royal Arctic Line KNI-mit avissaarmat ingerlatsivimmi siullerpaatut taamani atorfinitsinneqartoq, oqarpoq.

Jette Larsenip champagnemik kusanartumik poortorsimasumik umiarsuup saneraanut kuillugu atserpaa, puiaasarlumi pissusissamisut aserorpoq. Inuit ikittunnguit taamaalillutik Tukuma Arcticap atserneqarneranut najuuttut taava erinarsoqatigiipput atorlugu “Tapersilaannga”, nipilersortartumit Inunnguaq Petrussenimit sallertut erinarsoqataasumit siulersorneqarlutik.  

- Ulloq nuannaarfiuvoq. Kalaallit Nunaata nunarsuatta sinnerani niueqatiginninnissamut periarfissanik aallartisartoqarneranik ilimasaarivoq. Allatut ingerlaartalernissatsinnik anguniagaqarnitsinni kikkunnit tamanit nukippassuit atorneqarsimapput. Ukiuni arlalinni tassunga killinnissatsinnut ilungersorsimavugut. Taamaattumik umiarsuaatitta Tukuma Arcticap maani Nuummiinneranut attortilaanngitsuunngilanga. Umiarsuit assigeqqissaani allat marluk peqatigalugit Tukuma Arcticap Kalaallit Nunaat nunarsuup sinneranut attavigissaartinnerulissavaa, taamalu Kalaallit Nunaannik niueqateqarnissaq pisariinnerulersillugu. Tamanna suli angunngilarput, sukkasuumilli qanilliartorparput, Tukuma Arcticallu maanga Nuummut tikinnerata tamanna nuannersumik uppernarsarpaa.

Atsiinerup kingorna pisortaaneq Verner Hammeken taama oqarpoq. Taassuma 2015-imi aggustimi atorfinikkamili ingerlaaqatigiinnissamik isumaqatigiissut Vessel Sharing Agreement (VSA) anguniarlugu sulisimavoq, isumaqatigiissutillu maanna takussutissartarai Tukuma Arctica umiarsuillu assingi, Eimskipip pii Dettifos aamma Brúarfos.