Imaani sapiitsut Royal Arctic Linep inuummersoqquai

Nunarsuarmi tamarmi umiarsuarni niuffagiutini inuttaasut 1,6 millionit missaanniittut inuummersoqqullugit malunnartitsinissamut Royal Arctic Line peqataassaaq. Sulisartut ulluanni, tallimanngorpat maajip aallaqqaataani, nal. 12:00 nunarsuarmi niuffagiutit allat peqatigalugit umiarsuaativut siggartaqataassapput.

Taamaaliornissaq nunani tamalaani kattuffiit marluk, umiarsuaatileqatigiit ICS-ip assartornermillu suliallit kattuffiata ITF-ip kaammattuinerisigut pissaaq, taakkumi “imaani sapiitsorsuit” nerisassatsinnik, orsussamaatissatsinnik, nakorsaatissatsinnik pisariaqartitatsinnillu allanik pilersortuarpaatigut – ulluinnarni, aammali coronap atuunnerata nalaani. Piffissamimi tassani umiartortorpassuit soorlu nunamukaqqusaannginnermit eqqugaapput taamalu pilersaarutaanngitsumik sivisunerujussuarmik imaaniittariaqarsimallutik. Royal Arctic Linep umiartortuinut 250-inut tamanna aamma atuuppoq.

Umiarsuarni siggartitsinissaq, kattuffinnit “Sound your Horns”-imik atserneqarsimasoq, Kalaallit Nunaanni Royal Arctic Linep umiarsuaataanit tamanit taperserneqassaaq, soorlu Angaju Ittuk Pajuttaallu aammalu Sarfaq Ittuk Nuummi siggartassapput Anguteq Ittullu Aasianni. Aamma Tukuma Arctica, Mary Arctica, Irena Arctica, Malik Arctica, Minik Arctica, Ivalo Arctica Aqqaluk Ittullu summiiffimminni siggartarumaarput.

#HeroesAtSeaShoutout

DanishShipping aamma shippingics