COVID-19’p ajornartorsiortitsinerani Royal Arctic Linemi sulisut imminnut qanilliallannerupput
Sapaatip akunneri tamaasa Royal Arctic Linemi aqutsisut 50-it katersuuttarput pisut, upalungaarsimaneq, ajornaartoorfimmi periusissat attaveqaqatigiittarnerlu eqqartorlugit.
– Ajornartorsiornerup immitsinnut qanilliallatsippaatigut, pisortaaneq Verner Hammeken oqarpoq: – Kalaallit Nunaanni tamarmi Danmarkimilu immikkoortortaqarnerput unammillernartuuvoq. Pissutsit atuuttut nalaanni emailikkut allaqatigiittarneq naammanngilaq, taamaattumik aqutsisut qarasaasiatigut ataatsimiinnikkut, webinar-imik taasakkut, naapittarpagut, taamaaliornerullumi suliffeqarfissuarput millisutut ilisittarpaa. Upalungaarsimanitsinni periutsit ilaat qularnanngitsumik COVID-19’ip ajornartorsiortitsinerata kingorna aamma atorsinnaalluassavagut.
– Isumaqataavunga, neriuppungalu ataatsimeeriaaseq taama pitsaatigisoq ineriartortillugu coronap atuunnerata kingorna aamma atorluarumaaripput, Kujataani immikkoortortaqarfimmut umiarsualivinni pisortaq Efraim Tittussen, Qaqortoq, oqarpoq: – webinarit assut iluartarput nipitaa assitaalu tamarmik ersarittarmata. Pissarsiffigisaqaakka, malunnarporlu COVID-19-ip pinaveersaartinneqarnerani ataatsimoorluta suleqatigiilluinnartugut.
Immikkoortortumi Qeqqani umiarsualivinnut pisortap Solvej Møllerip webikkut ataatsimiinnerit coronap atuunnerata kingorna nangiinnarneqarnissaat takorloorluarsinaavaa: – Mailiinnakkut pisimasuugutta assinganik pissarsisimanavianngikkaluarpugut, toqqissisimanaqaaq tamatta taamatut malinnaatinneqaratta. Sulisut apeqqutaat assigiinngitsorpassuusinnaasarmata misigisarpunga ataatsimeereeraangatta piareersimaffiginerulerlugit, pisortatummi eqqissisimasariaqarpunga sulisukkalu eqqissisartariaqarlugit, Solvej Møller oqarpoq, nangillunilu:
– Toqqissisimanaraara pissutsit atuuttut ataatsimoorfigalugit suligatta.
Aamma Avannaani immikkoortortaqarfimmi umiarsualivinnut pisortap Magserannguaq Siegstad Albinusip Aasianniittup aqutsisut tamarmik assigiimmik malinnaatinneqarnerat iluaraa: – Tuniluuttoqarnerani pisoq nutaajuvoq misilinnikuunngisarput, taamaattumik apeqqutit assigiinngitsut suliffiup nalaani takkuttarput aqutsisutut piareersimaffigisassat paasiniagassalluunniit, aap, aamma isumaqarpunga immitsinnut ungasikkaluarluta ataatsimoorfeqartugut. Webikkut ataatsimiinnerit aatsaat misilippagut. Nuup avataaniilluni videokkut ataatsimiinnerit sungiusimavagut, isumaqarpungalu una ataatsimeeriaaseq atorneqartoq pisumut tulluuttuusoq, Magserannguaq Siegstad Albinus oqarpoq.
Royal Arctic Line 750-it missaannik sulisoqarpoq, Danmarkimi 130-t missaanniillutik umiarsuarnilu 240-t, tamarmillu Kalaallit Nunaata pilersorneqarnerata avammullu nioqqutissat assartorneqarnerannut qulakkeerinnissallutik akisussaaffimmik tiguseqataapput. Inuiaqatigiinni nappaammik tuniluuttumik nalaataqarfiusumi umiarsuarnik inuttaannillu ingerlatsisuulluni ulluinnarni mianersornissaq ajutoorfiusinnaasunullu pilersaarusioreernissaq pingaaruteqarpoq, assartuineq uninnginniassammat.