Ingerlaaqateqarneq 2020-mi ukiup sisamararterutaata aappaani aallartissaaq

Nunani avannarlerni killerni suleqatigiinnissamut, ilaatigut nunatta Islandillu akornanni ingerlaaqatigiinnissamik imaqartumik pilersitsinissamut, Royal Arctic Linep Eimskipillu isumaqatigiissutaat Vessel Sharing Agreement Islandimi unammilleqatigiinnermut aqutsisoqarfimmit pisortatigoortumik apriilip qaammataani akuersissutigineqarpoq.

Royal Arctic Line Eimskipilu suleqatigiinnerminnut atatillugu umiarsuarnik imarpikkoortaatinik nutaanik pingasunik peqatigiillutik sanatitsipput – umiarsuaq ataaseq Royal Arctic Linep pigaa Eimskipillu marluk pigalugit. Umiarsuit Kinami Guangzhoumi sananeqarput.

Royal Arctic Linemit nalunaarutigissavarput misileraalluni angalanissap piareersarneqarnerani Eimskipip umiarsuaani normu 1-imi akselgeneratorip teknikkikkut ajornartorsiuteqarnera paasineqarmat, tamannalu pissutigalugu umiarsuit suleqatigiinnermi atorneqartussat kinguaattoorutigineqassapput.

Siornatigut oqaatigineqartutut ukiup sisamararterutaani siullermi aallartisartoqarani 2020-mi ukiup sisamararterutaata aappaani siusissukkut aallartisartoqarsinnaanissaa sulissutigineqarpoq.

Royal Arctic Line sullitaminut ineriartorneq pillugu ingerlaavartumik ilisimatitsisassaaq.