Royal Arctic Line Eimskipip aningaasartuutaanut tapiissuteqassanngilaq

Ingerlaaqateqalernissamut atatillugu Islandimeersup Eimskipip aningaasartuutissaanut Royal Arctic Linep sutigulluunniit tapiissuteqarniannginnera umiarsuaatileqatigiiffimmit erseqqissaatigineqassaaq, Islandimiut umiarsuaatileqatigiiffianni Samskipimi pisortap tulliata, Gudmundur Thor Gunnarsonip, aviisimi Sermitsiami apersorneqarneranut atatillugu ima allaaserinnittoqarmat:

”Taamatuttaaq uparuagassaqqippoq isumaqatigiissummi allassimammat, RAL Eimskip aningaasartuutaasa ilaannut tapiissuteqartassasoq. Pisortat ingerlatseqatigiiffiutaata Islandimi ingerlatseqatigiiffimmut namminersortumut aningaasartuutitigut tapiissuteqartarnissaa Kalaallit Nunaannut pitsaavallaartuunngitsoq tunngavilersuutigineqarsinnaavoq, Gudmundur Thor Gunnarsson oqarpoq.”

- Tapiissutit (subsidier) tassaapput nioqqutissiap tuniniarneqarnerani akiata apparsarnissaanut pisortanit tapiissutaasartut. Royal Arctic Line Eimskipip aningaasartuutaanut TAPIISSUTEQASSANNGILAQ. Kiffartuunneqarnitsinnulli akiliuteqassaagut, soorlu allanut aamma taamatut kiffartuunneqarnissaminnik kissaateqartunut tamanna atuuttoq. Eimskipip umiarsuaataata ingerlaarnerisa nikisinneqarnerinut akiliuteqassaagut, ima paasillugu, Eimskipip Islandimit nunatsinnut assartuussineranut akiliuteqassaagut. Tamatumunngalu aningaasartuutaasoq suliniutip aallartinneraniilli ilanngullugu naatsorsorneqareerpoq, aamma ingerlatseqatigiiffiit akornanni ilisimaneqareerlunilu isumaqatigiissutigineqareerpoq, Royal Arctic Linemi pisortaanerup tullia, Aviâja Lyberth Lennert, taama oqarpoq.

Taamaammat nunatsinni ingerlatseqatigiiffik pisortanit pigineqartoq Islandimi ingerlatseqatigiiffimmut namminersortumut tapiissuteqassanngilaq.

Paasisaqarnerorusukkaanni attavigineqassaaq Pisortaanerup tullia Aviâja Lyberth, oqarasuaat 34 91 03, mail avll@ral.gl.