Tusagassiuutinut nalunaarut ulloq 21. marts 2019

Royal Arctic Linep Pituffimmi sakkutooqarfimmut US Air Force-mut immakkut angallassinissaq ingerlakkumallugu neqerooruteqarfigisimavaa.

Amerikami illersornissamut ministereqarfiup amerikamiut ingerlatsiviat Schuyler Line Navigation Company ukiuni tullerni marlunni ingerlatsisussatut toqqarsimavaa. Ingerlatsiviup aamma taassuma kingullermik neqeroortitsisoqarmat ingerlaarfissaq pissarsiaraa.

Royal Arctic Linep neqeroorutaa pissutsit marluk pillugit tiguneqanngilaq: Ilaatigut nalilerneqarpoq Royal Arctic Linep issittumi tassani ingerlatsisinnaanerminut tunngavigisai naammanngitsut. Ilaatigut aamma pissutigitinneqarpoq Royal Arctic Linep neqeroorutaata umiarsuarnik amerikamiunut attuumassuteqanngitsunik tunngaveqarnera. Attuumassuteqarnissaq illersornissamut ministereqarfiup ilitsersuutaani 4500.57-imi, immikkoortumi 6.4-imi piumasaqaataavoq, taamalu sullissisussanik toqqaaniarluni tulleriiaarinermi appasinnerit ilaattut Royal Arctic Line aallaqqaataaniilli inissisimalluni.

Royal Arctic Linep ukiuni tulliuttuni marlussunni uppernarsaatit pisariaqartut teknikikkullu upalungaarsimanerit Amerikami illersornissamut ministereqarfimmut 100 procentimik piareersimanissaat qulakkeerniarpai, taamaaliornikkut Qaanaap eqqaani pissusiviusut teknikikkullu tunngaviusut aallaavigalugit suleqatigiissinnaaneq pilersinneqarsinnaassammat.

Amerikamiut taamatut aalajangernerat Royal Arctic Linep aningaasatigut ingerlatsinermigut angusassatut naatsorsuutaanut sunniuteqassanngilaq niueqatigiinneq eqqarsaatigalugu teknikikkut aporfiup DoD 4500.57-ip immikkoortoq 6.4-p neqeroorutitsinnut aallaqqaataaniilli annertuumik qulartitsinera ilisimareeratsigu.

Tassunga tunngasumik annertunerusumik oqaasissaqanngilagut.

Verner Hammeken
Pisortaaneq/CEO  
Royal Arctic Line A/S
E-mail: vha@ral.gl