Ingerlatsinermut pisortaq / COO Taitsiannguaq Olsen soraarniuteqarpoq

Taitsiannguaq Olsenip allanik misigisassarsiorusulluni februaarip 25-anni soraarniutini 2019-imi aggustip naaneranit atuutilertussaq tunniuppaa.

Ukiuni makkunani immakkut attaveqarnerup iluani Royal Arctic Linep allannguiniarnerani Taitsiannguaq Olsen (Taitsi) pingaaruteqarsimavoq. Suliffeqarfiup allanngoriartuaarnerani Aalborgip Nuup ataanut inissinneqarnerani, terminalit nutaanik systemitaartorneranni, Nuummi nutaamik umiarsualivittaartoqarnerani, ingerlaarfissap nutaap piareersarneqarnerani, imarpikkut umiarsuassap nutaap ilusissaata toqqarneqarnerani, umiarsuaaqqat sisamaasut ilusissaasa toqqarneqarneranni aammalu amutsiviit isumaqatiginninniarfigineranni Taitsi pingaarutilittut inissisimasimavoq.

Taitsi umiarsuaatileqatigiiffimmi ukiuni 25-ni atorfeqarsimavoq 2015-imilu ingerlatsivimmi pisortatut toqqarneqarnissani tikillugu Royal Arctic Havneservicemi akisussaasuusimalluni. Taitsi aqutsisoqatigiit peqatigalugit taartissaminik oqitsumik ikaarsaartitsiniarpoq, tamannalu pillugu piffissami qaninnerpaami paasissutissiissuteqarumaarpugut.

Royal Arctic Line tamaat sinnerlugu Taitsi ukiorpassuarni taakkunani suleqatigilluarsimaneranut qujaffigerusuppara, immikkullu uanniit ukiuni sisamani kingullerni suleqatigiilluarsimanitsinnut. Taitsip ingerlaqqinnissamini sulilluarnissaanik pitsaanerpaamik kissaapparput.

Verner Hammeken, Pisortaaneq