Uummannamut aqqusaarnissaq siulleq

Royal Arctic Line-p Malik Arctica Uummannaliartilerpaa sikumik aserorteriartortillugu quersuarniillu ulikkaaqqasuniit qaleralinnik aallertillugu. Imatut ingerlasoqassaaq, Malik Arctica sikumik aserorteriitigaluni Uummannamukaassaaq, tassanngaanniit Minik Arctica Pajuttaallu Uummannamut tulallutik qaleralinnik aallissallutik.

Minik Arcticap Pajuttaatillu qalerallit qerisut Malik Arcticamut assartussavaat, Malik Arcticallu pallet 800-1.000-it missaanniittut usiliutissavai. Kingorna Malik Arctica kujammukarluni aallassaaq. Minik Arctica aamma qaleralinnik usilersorneqassaaq Aasiannut ingerlatassaminik, tassanngaanniit Atlantikukkoortaammut Danmarkimut ingerlasussamut usiliunneqartussanik. Pajuttaat periarfissaqassaaq nassiussanik Uummannameersunik useqarnissaminut. Umiarsuit taakku pingasut katillugit palle-t 1.800-2.000-it missaaniittut usiliutissavaat, qalerallit aammalu nassiussat nalinginnaasut.

Malik Arctica-p Aasianniit aallarnissaa naatsorsuutigineqarpoq sapaammi 12. maj 2019  unnukkut pissasoq, Uummannamullu tikinnissaa, Minik Arctica Pajuttaallu ingerlaqatigalugit, naatsorsuutigineqarpoq ataasinngornermi 13. maj 2019 pissasoq.

Royal Arctic Linep matumuuna aamma qamuteralannik ingerlasartunut qimussertartunullu erseqqissaatigerusuppaa, sikup aserorterneqareernerani ingerlaviginissaa ulorianarsinnaammat.

Arlaannik apeqqutissaqassagussi tikilluaqqusaavusi Royal Arctic Linep Sullitanut kiffartuussivianut imaluunniit Aasianni Uummannamilu umiarsualiviit allaffiannut saaffiginninnissassinnut.