Royal Arctic Linep nunaqarfiliartaatitaassaa kujaalerneqartoq

Royal Arctic Linep umiarsuaasa nutarterneqarnerat ingerlalluataarpoq. Atlantikukkoortaatissaq 2.150 TEU*-inik usisinnaasussaq qanittukkut Kina-mi singinneqarpoq, maannalu umiarsuaatileqatigiiffiup nunaqarfiliartaatitaassaasa marluk, Spaniami umiarsualiorfimmi Zamakona-mi sananeqartut, aappaata kujaa inissinneqarpoq.

Umiarsuassap kujaavani aningaasamik aggorsimasumik kuultiusumik ilisisoqarpoq kujaavalu assannik patillugu pilluaqqusaatinneqarpoq, nutaajulluni nunaqarfiliartaatip aappaa peqatigalugu Uummannap Upernaviullu illoqarfii pigisaallu pilersulerunigit akissarsiorluarniassammat ajoquseranilu ingerlaartarniassammat. Nunaqarfiliartaatit taakku marluk Vestlandia aamma Pajuttaat, pisoqalillutik atorunnaartussat, taarsissavaat.

Royal Arctic Linep Islandimilu umiarsuaatileqatigiiffiup Eimskip-ip ingerlaaqatigiittalernissaannut Islandimi unammilleqatigiinnermi aqutsisoqarfiup (ICA-p) qanittukkut akuersineratigut Kalaallit Nunaata ajornannginnerusumik niueqatigineqartalernissaa pillugu Royal Arctic Linep anguniagaa, umiarsuaatillu nutarterneqarnerat, qanilliartornerullunilu timitanikkiartorpoq.

Ingerlaaqatigiittarnissaq ukiup matuma naalernerani aallarteriarpat sapaatit akunneri tamaasa usinik Islandimeersunik, Savalimmiuneersunik Danmarkimeersunillu Nuummut tikittoqartalissaaq, soorlu aamma USA-mut, Canadamut, Asiamut Europamullu attaveqaatit pitsanngoriaateqassasut. Usit Nuummut tikiunneqartut Avannaanut Kujataanullu umiarsuit nutaat pineqartut, 2020-mi 2021-milu naammassisussat, atorlugit assartorneqartassapput.

Maajip aallartisimalernerani nunaqarfiliartaatissap siulliup sisattassaa Spaniami misissoriartorneqarpoq:

-        Sisaap pitsaassusia, svejserneqarnera sisaallu sinaasa silinerat naammagisimaarpagut. Suliaq pitsaasuuvoq, umiarsuaatigummi Kalaallit Nunaata imartaani angalasarnissaminnut tulluarsagaasariaqarput, Anders Bay Larsen, Royal Arctic Linemi Umiarsuarnut Ingerlatsivimmi pisortaasoq, oqarpoq.

Nunaqarfiliartaatit nutaat tamarmik immikkut 50 TEU*-inik useqarsinnaapput, 2 x 14-inillu inuttaqarlutik.

Eimskip-imik ingerlaaqateqalernermi Kalaallit Nunaanni inuussutissarsiortut periarfissariligaat pillugit Royal Arctic Linep sullitaminut paasissutissiinini aallartereerpaa.

*Teu 1 = containeri 20 fods ataaseq