2018 Royal Arctic Line A/S-imut angusaqarfiulluarpoq
Royal Arctic Line pingasunngornermi maajip aallaqqaataani 2019 ileqquusumik ataatsimeersuartitsivoq.
Ullormut oqaluuserisassanut ilaatigut ilaavoq ingerlatsiviup ukiumut nalunaarusiaata akuerineqarnera, siulersuisunilu ilaasortassanik qinersineq.
2018-imi ingerlatsineq, atuisut sulisullu Royal Arctic Linemi ukkatarineqarput. Umiarsuit ingerlaarnissaannut pilersaarutit 2018-imi aatsaat taama malinneqartigipput, 88 %-miillutik 2017-imi 36 %-imiissimalluni, akornusiisutuaasimallutillu siku, anori silallu allatut pissusai. Aamma umiarsuaatileqatigiiffiup nassiussassanik inniminniilluni qarasaasiatigut atortorissaarutaa 2017-ip naajartornerani patajaallisarneqarmat tamanna ukiup aallartilaarneranili kiffartuussinitta pitsanngorneranut sunniuteqarpoq. Suleriaatsit system-illu siuarsaqqinnerisa Royal Arctic Linemut tatiginninneq utertippaat sulisullu suliffimminnik naammagisimaarinninnerat 2016-imi killiffiup qaangerneqarneranik kinguneqarluni.
Royal Arctic Line 2018-imi nukittorsarluarneqarpoq. Nunarsuup sinneranut ammanerusumik assartuinikkut ingerlatsinissap anguniarnerata tunngavissaa malunnartumik pitsaanerulerpoq.
Royal Arctic Linemi “Kalaallit Nunaata ajornannginnerusumik niueqatigineqarsinnaanera” qanilliartortinneqarpoq. Kalaallit Nunaata nunanut allanut pitsaanerusumik attaveqalernissaa, atuisunik kiffartuussinitta pitsanngorsaavigiuarnissaa, pisariillisaaneq suleriuutsinillu nutaanngorsaanerit assartuinermilu akinut patajaatsunut tunngavissarsiornerit, akit appasinnerpaaffimmitsinniarnerat anguniarlugu, ullut tamaasa suliuarpugut, minnerunngitsumillu suliffeqarfiup suliffigiuminarnissaa ullut tamaasattaaq sulissutigaarput, tamakku tamaasa Kalaallit Nunaata ineriartornera siuarsarneqarneralu sapinngisamik pitsaanerpaamik peqataaffiumallugu.
Qeqertani Nuummi umiarsualivittaap inissisimanerata sungiukkiartuaarnerani sulineq malunnartumik sukkanerulerpoq, tamannalu umiarsuit pilertornerusumik imaarneqarlutillu usilersorneqarnerannik kinguneqarpoq.
Nuummi quersuaq sullitanut sullissivimmut nuunneqarpoq aqutsinikkut suliassanik agguataarineq pitsaanerpaaq anguniarlugu, saaffiginnittarfiullu sullitanut sammisup, ilaatut ilanngunnissaa oqilisaaffiginiarlugu.
Royal Arctic Linep suliffeqarfissuartut 2018-imi angusaani 24,1 mio. kronit sinneqartoorutaapput, akileraareernerup kingorna 14,1 mio. kroniusunik, 2017-imut sanilliussigaanni 7,5 mio. kronit taamani amigartoorutaapput akileraareernerup kingorna 6,6 mio. kroniusut.
Ukiumut angusaq pisortaqatigiit ilimagisaattut angitigaaq, pigisatullu ingerlatsiviup Arctic Umiaq Linep aatsaat taama amerlatigisunik, akileraarnerup kingorna DKK 5,7 mio.-nik, sinneqartooruteqarneratigut (2017: DKK 4,5 mio) Royal Arctic Line suliffeqarfissuartut ilimagisamiit pitsaanerusumik, aammalu suliffeqarfittut nutaaliornerup nalaaniinnera eqqarsaatigalugu pitsaalluinnartumik angusaqarpoq.
Royal Arctic Linep akiliisinnaassusia allanngorani 2018 naasoq 56,4 %-imiippoq.
Aningaasatigut aqutseriaatsit siumut isigisut nutaat Royal Arctic Linep 2018-imi atuligai ullumikkumut angusaqarfiulereerput. Taakku pissutigalugit umiarsuarnut nunaqarfiliartaatinut nutaanut sisamanut 2018-imi inniminnikkanut aningaasalersuineq pitsaalluinnartunik aningaaserivinnit piumasaqaatitaqartinneqarput. Aningaasatigut periuseq erseqqissoq tunngavigalugu aningaasatigut maanna atukkatta tunngavii Royal Arctic Linep ullumikkut piviusumik inissisimaneranut nalimmassarneqarput, aningaaseriviillu piumasaqaataat Kalaallit Nunaannut iluaqutaasussamik aaqqinneqarlutik.
HR-ip tungaatigut aqutsisussanik ilinniartitsineq annertuumik ukkatarineqarsimavoq, atorfinititsisarnermilu tunngavigisat eqqortut malillugit atorfinititsisarnikkut sulisutta ineriartoqqinnissaminnut pilerinerat annertusarneqarluni, sullitatsinnut inuiaqatigiinnullu kalaallinut ataatsimut isigalugu iluaqutaasussamik.
Siulersuisuni siulittaasoq Ulrik Blidorf:
“Royal Arctic Line inuiaqatigiinni annertuumik akisussaaffeqarpoq, tassungalu ilaavoq Kalaallit Nunaanni ilinniagaqarnerit ineriartorsinnaanerannut pisussaaffimmik qulakkeerinninneq. Taamaattumik aqutsisussanik ilinniartitsineq sungiusaanerlu Royal Arctic Linemi ataatsimut isigalugu annertuumik eqqumaffigineqarmat nuannerpoq, immikkullu ittumik nuannaarutigalugu nalunaarutigissavara siulersuisut novemberimi ataatsimiinnerminni aalajangermassuk umiarsuaatileqatigiiffiup containerinut umiarsuartaassarsuata nutaap, Eimskip-imik suleqateqarluni ingerlaarnissami 2019-ip naalernerani atulersussap, initai sinneruttut kalaallit umiartortuisa amerlanerit nunani tamalaani umiartortuunerup misiliinissaannut ilinniartinnissaannullu atorneqassammata. Ilinniartitaanermi ataqatigiissaarisoq ilinniartitaanerlu tulleriiaakkamik aaqqissuussaq atorlugit, umiarsuaatileqatigiiffiullu umiarsuaatai sorliugaluartulluunniit aamma atorlugit, Kalaallit Nunaanni imarsiornermi ilinniartitaanernut sapinngisamik pitsaanerpaanik periarfisseeqaataassaagut”.
Siulersuisuni maannamut atuuttuni ilaasortaasut Tanja Nielsen aamma Amma Knudsen Minannguaq Zeeb-imit Stefan Buch-imillu kingoraarneqarput Royal Arctic Linemilu siulersuisut maanna ukuulerput: siulittaasoq Ulrik Blidorf, Erik Østergaard, Mai-Lill Ibsen, Minannguaq Zeeb aamma Stefan Buch. Royal Arctic Linemi sulisut akornanni 2018-imi qinersisoqarpoq, tassanilu Jens Peter Rosing Berthelsen qinigaaqqippoq, Eydun Simonsen aamma Laust Vestergaard nutaatut isertut.
Ukiumi angusanut annerusumik paasisaqarusuttunut innersuupparput: www.ral.gl/
Annertunerusumik paasisaqarusukkuit attavigiuk Pisortaanerup tullia Aviâja Lyberth Lennert, oqarasuaat 34 91 03, mail avll@ral.gl