Royal Arctic Line aamma Eimskip oqaluttuarisaanermut ilannguttussamik suleqatigiilerput

Royal Arctic Line aamma islandimiut umiarsuaatileqatigiiffiat Eimskip VSA (Vessel Sharing Agreement) tunngavigalugu suleqatigiissinnaanermik ullumi Islandimi unammilleqatigiinnermut qullersaqarfimmit (ICA-mit) pisortatigoortumik akuerineqarput. Tamanna nunani avannarlerni killerni suleqatigiilernissamut aallartitsinermik isumaqarpoq, Kalaallillu Nunaata Islandillu umiarsuarnik avitseqatigiilluni ingerlaaqatigiittalernissaannut, illua-tungeriinnut tamanut iluaqutaasussamik, ilaqarluni.

”Kalaallit Nunaannut, Islandimut aammalumi Savalimmiunut oqaluttuarisaanermut pingaarutilimmik ullumi pisoqarpoq, Islandimi unammilleqatigiinnermut qullersaqarfiup nunat avannarliit killiit akornanni imaatigut assartuineq pisariillisarlugu suleqatigiilernissaq akuerimmagu. Maanna Islandimut Islandimiillu pissutsit nunani allani atuuttut assigalugit ingerlaalersinnaagatta qujanarpoq, tassami kiffartuussinikkut unammillersinnaanngorpugut, tamannalu ilutigalugu umiarsuarmi inissaq akisooq aamma avissinnaanngussallutigu. Taamaaliornitsinni aningaasartuutigut avatangiisinullu nanertuutaasinnaasut annikillisissavagut”, Royal Arctic Linep pisortaanera CEO Verner Hammeken oqarpoq.

Royal Arctic Linep nutarternerani suleqatigiilernissaq pingaaruteqarsimavoq, taamaattumik suleqatigiilernissamut tunngaviusussaq kingulleq maanna piviusunngormat umiarsuaatileqatigiiffiup nuannaarutigaa.

”Assartuinermi akinik pitsaasunik ukiorlu naallugu sapaatip akunnikkaartumik kiffartuussineq sullitatsinnut neqeroorutigisinnaanngussagatsigu qilanaaraarput. Tamanna pisinnaavoq Eimskip-imut isumaqatigiissuterput tunngavigalugu annertuunik ingerlatsinermi iluaqutissat qulakkeersimagatsigit, tamassumalu imaatigut angallassinerput akikinnerulersillugulu pitsaanerulersissammagu, Royal Arctic Linep pisortaanera CEO Verner Hammeken oqarpoq.

Royal Arctic Line aamma Eimskip ullumikkut Kalaallit Nunaanni, Islandimi, Savalimmiuni Europamilu niuerfinni anginngitsuni sulipput, tassanerpiarlu imaatigut angallannikkut suleqatigiinnissaq immikkut ittumik soqutiginaateqarpoq. Taamaattumik unammilleqatigiinnermut qullersaqarfiup aaliangernera nuannaarutigineqarpoq.

• VSA tunngavigalugu suleqatigiinneq isumaqarpoq Islandip Europallu akornanni assartugassanut Royal Arctic Line maanna neqeroorsinnaanngormat. Pilersaarutit malillugit taamatut ingerlaaqatigiinnissaq siulleq pissaaq 2019-imi decembarip qaammataani.
• Islandimi unammilleqatigiinnermut qullersaqarfiup aaliangiineratigut Royal Arctic Linep umiarsuaatileqatigiiffimminik nutarterinera, Kalaallit Nunaannullu, aamma Kalaallit Nunaannit angalasarnerup nutarterneqarnera, pingaarutilik ukkatarisinnaalerpaa.
• 2019-ip ukiaani umiarsuit imarpikkoortaatit nutaat pingasut, Royal Arctic Linep Eimskip-illu peqatigiillutik pisiaat – Royal Arctic Linep umiarsuaq ataaseq pigaa Eimskip-illu marluk – naammassissapput. Umiarsuit piffissami pitsaasumi, uuliap sisaallu akikinnerisa nalaanni pisiaapput.

Paasisaqarnerunissamik attavissaq:
CEO Verner Hammeken
Mail: vha@ral.gl
Oqarasuaat: +299 34 91 00