Mette Frederiksenip Royal Arctic Line pulaarpaa: Kalaallit Nunaata niueqatiginera ajornannginnerussaaq
Danmarkip ministeriunerata Mette Frederiksenip nunatsinnut pisortatigoortumik tikeraarnerminut atatillugu Royal Arctic Line (RAL) ullumi pulaarpaa. Pisortaaneq Verner Hammeken naapippaa nunattalu niueqatiginerata siunissami qanoq ilillugu ajornannginnerulersissinnaanera oqaluuseraat.
Danskit ministeriunerat RAL-ip Qeqertani umiarsualivimmi qullersaqarfittaavanut nal. 10:30 tikiuppoq. Pisortaanermit Verner Hammekenimit umiarsuaatileqatigiiffimmilu pisortaanerup tullersortaanit Aviâja Lyberth Lennertimit ingerlatsinermullu pisortamit Ivalu Kleistimit tikilluaqquneqarpoq. Pulaarneralu aallarnerlugu Verner Hammeken saqqummiivoq RAL-illu ukiut 245-t sinnerlugit oqaluttuarisaanera umiarsuaatileqatigiiffiullu ukiualuit matuma siorna unammilligassarisimasai oqaluttuaralugit, aamma umiarsuaatileqatigiiffiup ullumikkut nutaaliatut siunissamullu piareersimasutut pitsanngorsaavigineqarnera oqaluttuaraa.
– Uannut pingaarpoq ministeriunermut oqaluttuarissallugu umiarsuaatileqatigiiffittut nutaaliatut Kalaallit Nunaat pitsaasumik ineriartorfioreersoq annertuumik suleqataaffigigatsigu. Ilaatigut sulisutta ilinniarnissaannut akisussaaffik tiguarput taamaalillutalu nunatsinni piginnaasatigut inerisaaqataalluta. Aamma Kalaallit Nunaata niueqatiginerata ajornannginnerulersinnissaanik anguniagaqarpugut. RAL-imimi kissaatigaarput assartuussinikkut aaqqissuussinerit nutaat atorlugit tikitassanullu nutaanut toqqaannartumik attaveqalernikkut Kalaallit Nunaata nunarsuup sinneranut attaveqarnera ammanerulersissallugu, tamannalu Kalaallit Nunaanni suliffeqarfinnut naalagaaffeqatigiinnullu tamanut periarfissanik nutaanik pilersitsissaaq, Verner Hammeken oqarpoq nangillunilu:
– Royal Arctic Linep pulaarnissaata piffissaqarfigineqarnera nuannaarutigalugulu tulluusimaarutigaarput. Pingaartumillu ministeriunerup angallanneqarnermini sulisutta ilassinissaannut piffissaqarnera nuannaarutigaara. Misigivunga Kalaallit Nunaata niueqatiginerata ajornannginnerulersinnissaanik anguniakkatsinnut tunngaviusoq pillugu oqariartuutigisagut apuulluarlutigit. Mette Frederiksen malittaalu apeqqutissaqarluarput misigisimavugullu aaqqissuussinerput tamarmi ingerlalluartoq.
USA-mut aqqut nutaaq
Kalaallit Nunaata niueqatiginerata ajornannginnerulernissaanik periusissap ilaatut niuernikkut aqqutissanik nutaanik pilersitsisoqassaaq. Ilaatigullu USA-mut aqqummik nutaamik pilersitsinissaq pilersaarutigineqarpoq, taannalu pilersaarutit malillugit 2020-mi februaarip qaammataani atuutilissaaq. Suliaqarfitta ilaa taanna Mette Frederiksenip RAL-imi ullumikkut ataatsimeeqatigineqarnerani aamma oqaluuserineqarpoq.
– Isumaqarpunga RAL-ip attaveqarnermi pingaarutilimmik inissisimanera Mette Frederiksenip paasilluaraa, aammali suliffeqarfiusugut siunissaq eqqarsaatigalugu niuernikkut attaveqaatinik nukittorsaanermi suleqataasussaq. Tamanna aamma Royal Arctic Linep USA-p niueqatiginerata ajornannginnerulersinnissaanik kissaateqarneranik USA-mut paasititsissaaq, Verner Hammeken oqarpoq.
Verner Hammekenip saqqummiinerata kingorna talittarfik containerilersorfiusoq aamma takuniarneqarpoq. Mette Frederiksenillu RAL-ip nunaqarfiliartaataata ilaannik alakkaanissaminut periarfissinneqarpoq. Aamma Mette Frederiksen nunaqarfiliartaammut Ivalo Arcticamut ikinnginnermini sulisut siuleriiaassimasut arlallit ilassivai.
Annertunerusumik paasisaqarumagaanni attavigineqarsinnaavoq:
Ann-Britta A. Olsvig oqarasuaat 349104, mobil 564200, mail abr@ral.gl