IMO-p qullersaa Ilulissani Royal Arctic Linemut pulaartoq

Namminersorlutik Oqartussat Imarsiornermut Aqutsisoqarfik aamma Danske Rederier suleqatigalugit Naalagaaffiit Peqatigiit Imarsiornermut suleqatigiiffiata IMO-p qullersaata, Kitack Limmip, peqataaffigisaanik Issittumi umiartorneq pillugu Ilulissani isumasioqatigiissitsipput.

Issittumi imarsiorneq allanngoriartorfiuvoq tamannalu suliffeqarfinnut oqartussanullu isumannaallisaanikkut avatangiisitigullu unammilligassaqartitsivoq.

Royal Arctic Linep Danmarkimi nunatsinnilu oqartussat, ilaatigut Avatangiisinut inuussutissalerinermullu aqutsisoqarfik, Danmarkimi silasiorfik, Geodatastyrelsi aamma Ineqarnermut Attaveqaqatigiinnermullu naalakkersuisoqarfik peqatigalugit ataatsimiinnerit aaqqissuussinerillu ulluni kingullermi marlunni peqataaffigai.

Ilulissani aaqqissuussineq Royal Arctic Linep umiarsualivimmi allaffiani umiarsuarmilu Irena Arcticami naggaserneqarpoq. Ingerlatsinermut pisortaq Ivalu Kleist umiarsuarnillu ingerlatsivimmi pisortaq Anders Bay Larsen kiisalu umiarsualivimmi umiarsuarmilu sulisut ingerlatsineq pillugu saqqummiipput.

Ulluni kingullerni marlunni aaqqissuussinerit oqaloqatigiinnerit ingerlateqqinnissannut pingaaruteqarluinnartutut Royal Arctic Linep isigai. Verner Hammeken ima oqarpoq:

”Tikeraaqarnerput sutigut tamatigut nuannerluinnarpoq, Kitack Limmillu Hong Kongimi siorna qaaqqunerata kingorna ilimagisatsinnit iluatsitsilluarneruvugut. IMO-p qullersaa allattoqarfianilu pisortaa Arsenio Domingues nunatsinni imarsiornikkut ingerlatsinermi pissutsit, siunissamilu aaqqiissuussinerni suliffissuaqarnerup inuiaqatigiillu immikkut ittumik eqqarsaatigineqarnissaat qularnanngitsumik paasisaqarfigilluarpaat. Aammattaaq Namminersorlutik Oqartussat, IMO-p, Danmarkimilu aqutsisoqarfiit soqutigisaqaqatigiillu akornanni attaveqatigiiffissaannik pitsaalluinnartumik pilersitsisoqarpoq”.

Tikeraartoqarneratigut nunarput IMO-mit pimoorussamik oqaluuserisassanngortinneqarpoq IMO-llu Issittumi Siunnersuisoqatigiinni alaatsinaattutut inissisimaneranut tunngatillugu annertuumik angusaqarfiusinnaassalluni.

Royal Arctic Line, aggustip 28-ani 2019