Assartuinermut aalajangersakkat

Aalajangersakkat ataani allattorneqartut nassiussat Royal Arctic Linep nammineq umiarsuaatiminik attartugaanilluunniit assartorneqartunut tamanut atuutsinneqarput aalajangersakkanullu piumasaqaatinullu allanut Royal Arctic Linemut isumaqatigiissuteqarnermut atatillugu innersuussutigineqartunit tamanit salliutinneqarlutik atuutsinneqarlutik.

§ 1 Royal Arctic Linep nassiussat tamaasa tunngaviatigut containerinut poortortarpai, tamanna pisinnaatillugu, aamma nassiussat isumannaallisarumallugit flatracksinut assartuutinulluunniit assingusunut allanut nassiussanik poortuinissaq periarfissaavoq. Nassiussat poortorneri poortuunnerilu DHAB 2007-imi aalajangersakkat naapertorlugit suliarineqartarput, poortuineq poortuussinerlu umiarsualivimmi usingiarfiullunilu usilersuiffiusumi umiarsualiveqarfimmi pinngippat, taama pisoqartillugu suliassanut tamakkununnga umiartornermut inatsit atuutsinneqarmat.

§ 1A Royal Arctic Linep nassiussat containerinut, flatracksinut assartuutinullu assingusunut poortorneqarsimasut tamaasa umiarsuup qaavani usitut assartorsinnaatitaavai. Pissutsit immikkut ittut pisariaqartippassuk usit tamalaat umiarsuup qaavaniitillugit aamma assartorneqarsinnaapput. Royal Arctic Line nassiussanik containerinut imaluunniit allatut matoqqasumik poortorneqarsimasunik Royal Arctic Linemut tunniunneqartunik misissuineq ajorpoq, tassungalu ilanngullugit poortuutit, nassiussat qanoq inneri qanorlu poortuunneqarsimanersut.

§ 2 Royal Arctic Linep sullissineranut ilaapput nassiussassanik umiarsualivimmi usilersuiffiusumi tunniunneqartunik umiarsuarmut usilersuineq, assartuussineq, kiisalu nassiussat umiarsualivimmi usingiarfiusumi usingiarnerat. Nassiussassat tunniunneqarnerinit tigusisussamit tunniunneqarnissaasa tungaanut umiarsuarmi umiarsualivimmiluunniit Royal Arctic Linemit paarineqartillugit, kingusinnerpaamilli quersuarmiititsinermut/containerimik attartornermut akiliutissap naatsorsorneqarfissaa tunniussinissamut allagartami ulloq allassimasoq nallertinnagu, Royal Arctic Linemit umiartornermut inatsimmi aalajangersakkat malillugit akisussaaffigineqarput. Quersuarmiititsinermut/containerimik attartornermut akiliutissap naatsorsorneqarfissaanut ulluliussap kingorna allakkatigut allatigut isumaqatigiissuteqartoqarsimanngippat, nassiussat tigusisussamit akisussaaffigineqarlutillu akiligassanngortinneqassapput. Aammattaaq nassiussanut inniminniinerup uppernarsarneqarnerani tunniussiffissatut allanneqarsimasoq sioqqullugu tunniunneqartunut, allakkatigut allatigut isumaqatigiissuteqartoqarsimanngippat, tunniussiffissap aallartinnissaata tungaanut nassiussassat nassiussisumit akisussaaffigineqarlutillu akiligassanngortinneqarnissaat atuuppoq.

§ 2 A Royal Arctic Line nassiussanik, nassiussat allagartaat naapertorlugu assartorneqartunik, nassiussat allagartaanni tigusisussatut allanneqarsimasumut tunniussisinnaavoq.

§ 3 Royal Arctic Linep nassiussanut akisussaaffiata umiartornermut inatsimmi § 280 naapertorlugu assartuussisup akisussaaffigisaa qaangersinnaanngilaa, akisussaaffillu kollimut/nassiussamut immikkoortumut allamut ataatsimut SDR 667-imut killiligaavoq imaluunniit nassiussap tamakkerlugu oqimaassusianut kg-mut SDR 2. Kinguaattooruteqarnermi akisussaaffiup nassiussap pineqartup X 2,5 qaangersinnaanngilaa. Akisussaaffiulli assartuussinissamik isumaqatigiissut naapertorlugu nassiussaq tamarmiusoq qaangissanngilaa. Assartuussinermut allagaammik allagaammiluunniit allamik, nassiussat nalinginik paasissutissiiffiusumik assartuussisumut tunniussisoqarsimappat, tamanna Royal Arctic Linep umiartornermut inatsimmi aalajangersarneqartut naapertorlugit akisussaaffigisaa qaangerlugu akisussaaffilerneqarneranik kinguneqarsinnaanngilaq.

§ 4 Royal Arctic Line umiartornermut inatsimmi § 277 naapertorlugu uumasunik uumatillugit nassiussanik annaasaqarnermut ajoqusertoqarneranullu, taamatut assartuinermi aarlerinaateqarsinnaasunut attuumassuteqartunut akisussaatinneqarsinnaanngilaq.

§ 5 Royal Arctic Linep nassiussanut nalunaarummi nalunaarsorneqarsimanngitsunut inniminniinermilu uppernarsaateqartinneqanngitsunut sutigulluunniit akisussaatinneqarsinnaanani matumuuna nalunaarutigaa, Royal Arctic Line kukkussuteqaraluarpat sumiginnaasimagaluarpalluunniit tamanna atuuppoq. Royal Arctic Line pisinnaatitaavoq nassiussanik taama ittunik assartuinermik siumoortumik nalunaaruteqaqqaarani unitsitsisinnaalluni.
§ 6 Royal Arctic Line pisinnaatitaavoq assartuussinissaq isumaqatigiissutigineqartup imaluunniit paasissutissiissutigineqartup avataatigut umiarsuarmut allamut isumagitissinnaallugu. Inniminniinnermut uppernarsaat Royal Arctic Linemit tunniunneqartarpoq, tassanilu sillimaffigeqquneqarpoq nassiussat umiarsuarmut ikineqarnissaannut umiarsuup usilersorneranut pilersaarut inaarutaasoq apeqqutaatinneqartoq. Royal Arctic Linep nassiussanik aallarfissamut kingusinnerusumut nuutsitsisinnaanera isumaqatigiissutigineqarpoq, sullitallu tamatumunnga atatillugu Royal Arctic Linemut piumasaqaateqarsinnaanngilaq.

§ 7 Royal Arctic Line pisinnaatitaavoq nassiussisumut erseqqissumik nalunaaruteqarsinnaalluni assartuussinerup aalajangersimasup ilaa assartuussisumit allamit isumagineqassasoq, Royal Arctic Linelu taamaalilluni nassiussat assartuussisumit allamit paarineqarnerini arlaatigut pisoqarnerani annaasaqartoqassagaluarpat akisussaatinneqarsinnaanngitsoq.

§ 8 Royal Arctic Line pisinnaatitaavoq angalanissamut pilersaarutit ingerlaarfiillu nikisissinnaassallugit, pissutsit Royal Arctic Linep naliliinera malillugu tamanna pisariaqartippatigit.

§ 9 Kalaallit Nunaanni Danmarkimilu nassiussanik usilersuinermut, usingiarnermut aamma/imaluunniit uninngasuuteqarnermut atatillugu pissutsit ajornakusoortuuneri pissutigalugit ajoquserneri, annaaneri imaluunniit kinguaattoorutigineqarneri Royal Arctic Linep akiligassarinngilai. Ajoqusernerit, annaasat imaluunniit kinguaattoornerit taama pisoqarnerani pisimanerisa uppernarsarnissaat Royal Arctic Linemit pisussaaffigineqarpoq.

§ 10 Umiiartoqartillugu sumiiffimmi Royal Arctic Linemit toqqarneqartumi naatsorsuisoqassaaq, York/Antwerpenip ataani malittarisassat kingulliit naapertorlugit, usinillu tigusisussaq (usinik piginnittoq) pisussaatitaassaaq umiiartoqarnerani akiliummik akiliissalluni ajoqusernerit inatsisit atuuttut malillugit naatsorsorneqareerpata, umiiarnermut qularnaveeqqusiussaq tassannga akiligassanngortinneqanngikkaluarpalluunniit.

§11 Angallassineq Royal Arctic Linep akigititai kiisalu umiartornermut inatsimmi kapitalimi 13-imi malittarisassat atuuttut naapertorlugit tamatigut ingerlanneqassaaq.
§ 12 Nassiussaq tunniunneqareerpat, tigusisorlu annaasaqarnermik ajoqusernermilluunniit Royal Arctic Linemut allakkatigut ilisimatitsisimanngippat, nassiussap tigunerani malugisimasaminik imaluunniit malugisimasariaqakkamik, kiisalu ajoqusersimanerata annertussusaanik paasissutissiisumik imalimmik, taava nassiussaq ajoqusersimanngitsutut nassiussallu allagartaanisut allaqqasutut isigineqassaaq. Tunniussinermi nassiussap ajoqusersimanera malugineqanngippat tamanna aamma atuutissaaq nassiussap tiguneranit kingusinnerpaamik ullut pingasut qaangiutsinnagit allakkatigut nalunaarutigineqanngippat. Nassiussaq ajoqusersimappat aserorsimappalluunniit taava Royal Arctic Line nassiussamillu tigusisoq nassiussamik misissueqatigiissapput torersumik ingerlanneqartumik, tassani nassiussap oqimaassusia, angissusia amerlassutsillu paasiniarneqassallutik.

§ 13 Nassiussaq assartuummik allamik Royal Arctic Linep assartuinissamut isumaqatigiissuteqarnermigut atortitaanik angallanneqarnermini ajoqusersimanera, tammaaneqarnera imaluunniit kinguaattoornera paasineqarpat, taava Royal Arctic Line akisussaasuussaaq, assartuinermi inatsisit atuuttut naapertorlugit aammalu nalinginnaasumik peqqussutigineqartut Royal Arctic Linep assartuinermi suleqatigisaani atuuttut malillugit.

§ 14 Aningaasat, pappiaqqat nalillit, allallu nalillit pillugit, Royal Arctic Line taamaallaat akisussaasuussaaq, tamanna pillugu erseqqissumik allakkatigut isumaqatigiissusiortoqarsimappat.

§ 15 Royal Arctic Line nassiussalerinermi piginnittussaatitaasutut allaqqavoq, ingerlatseqatigiiffiup nakkutigisaaniittuni, ilaatigut nassiussat inissisimaffiini, aammalu quersuarmik attartornermi taamatullu Royal Arctic Linep siusinnerusukkut angallassinernit kiffartuussinernillu pisassarisai kiffartuussisitsisuminngaanneersut. Nassiussaq tammarpat aserorpalluunniit, taava Royal Arctic Line sillimmasiisarfimmit taarsiivigitinnissamut pisinnaatitaavoq, nassiussap akianut aningaasartuutinullu allanut matussusiisussanik. Akileeqqusissut akilerneqanngippat, taava Royal Arctic Line pisussaatitaavoq aarlerinanngitsumik nassiussamik tunisinnaasaminik tunisisinnaalluni, taamaalilluni ingerlatseqatigiiffiup pisassarisai, aningaasartuutit ilanngullugit, matussusersinnaajumallugit.

§ 15 A Assartuinermut akiliut tamatigut akilerneqartassaaq, aamma nassiussaq assartuinerup naammassineqarnerani ajoqusersimanngikkaluarpalluunniit assartuinermut akiliut utertinneqarsinnaanngilaq, imaluunniit nassiussaq ajoqusersimagaluarpalluunniit nassiunnerata akia qaqugukkulluunniit utertinneqarsinnaanngilaq taarserneqaranilu.
§16 Royal Arctic Line umiartornermut inatsimmi § 272 naapertorlugu nassiussat aaneqarnissaannik allagaqaraluarnerup kingorna aaneqanngitsoortut tuniniarsinnaatitaavai. Allakkatigut sullitamut Royal Arcticimit nassiussaq tigusisussamut tiguneqarsimasutut isigineqassaaq, allamik tutsaqartoqanngippat. Royal Arctic Linep nalilerpagu nassiussap nalingata tuniniarnerani aningaasartuutaasut matussusernavianngikkai, taava allatut Royal Arctic Linep nassiussaq allatut illersorneqarsinnaasumik atorsinnaatitaavaa. Nassiussaq tunineqarpat aningaasartuutigisallu tamakkiisumik matussuserneqanngippata, taava nassiussisoq akisussaasuuvoq aningaasartuutit matussuserneqanngitsut akilissallugit.

§ 17 Royal Arctic Line assartuinermut usingiaanermut inissisimatitsinermullu atatillugu nassiussanik ajoqusertunik akisussaasuussanngilaq, ajoqusernerit silap pissusianik peqquteqarpata, allatigulluunniit kiassuseq/nillissuseq peqqutaalluni nassiussaq ajoqusersimappat. Royal Arctic Line taamaammat akisussaasuussanngilaq assersuutigalugu nassiussat nalinginnaasutut allaqqatillugit nassiussat qerisoorlutik ajortissimappata.

§ 18 Assartuinermut aalajangersakkani matumani aalajangersakkat Royal Arctic Linep oqartussaaffii aammalu akisussaaffimmik killeqartitsineri atuutissapput Royal Arctic Linep suliassaqarfiisa iluini piumasaqaateqartoqarpat, piumasaqartullu uppernarsarsinnaappagu sulisup sulinermini suliassamillu naammassinninniarnermini iliuuseqarsimasoq. Akisussaaffik tamakkiisoq Royal Arctic Linemut suliassaqarfiinullu tutsinneqarsinnaasoq sukkulluunniit akisussaaffiup killeqarfii qaangissanngilaat, umiartornermut inatsisimmi § 280, imm. 3 naapertorlugu.

§ 19 Suliakkiisup pisussaatitaaffigaa kukkusoqarsimanngikkaluarpalluunniit Royal Arctic Line annaasaqartissanagu nassiussanik ajoqusertoqarsimappat ima pisoqarsimatillugu, a) paasissutissat nassiussamut tunngassutillit eqqortuunngippata, ersernerluppata imaluunniit amigaateqarpata, b) nassiussaq amigartumik poortorneqarsimappat, amigartumik nalunaaqutserneqarsimappat imaluunniit imarisaasa suussusiisa allassimanerat amigaateqarpat, imaluunniit suliakkiisup amigartumik usiliussimappagu, qajannaarsornerlussimappaguluunniit, c) nassiussaq ajoqusiisinnaasunik imaqarpat, Royal Arctic Linemut takujuminaassinnaasunik, d) umiarsuaatileqatigiiffik suliakkiisup kukkussuteqarneranik sumiginnaaneranilluunniit akitsuutinik akiligassaqalerpat imaluunniit pisortat akitsuusersuutaannik eqqugaappat qularnaveeqquseqquneqarpalluunniit. Suliakkiisup akisussaasuuneranik aalajangiussineq immikkoortuni a)-mi b)-milu isiginiarneqassaaq Royal Arctic Line nalunngikkaluarlugu pissutsit qanoq isikkoqarnersut akuersisimanera imaluunniit nassiussanut tunngasunik suliakkiisumut naqqiissummik oqaaseqarsimanngippat.

§ 20 Nassiussisup usit navianartut imaluunniit usitut navianartutut immikkut allagartaqartinnagit nassiunneqarsinnaanngitsut nassiuppagit paasissutissanik imaqartinnagit, imaluunniit usit suunerinik allaqqatitaqarani, taava nassiussisoq akisussaasuuvoq umiarsuaatileqatigiiffimmut assartuisunulluunniit ajoqusernernut annaasaqaataasunulluunniit, taassuma iluaniilluni akiligassinneqarneq. Taamaattoqarnerani nassiussisoq pisussaatitaavoq umiarsuaatileqatigiiffimmut akitsuutinik DKK 25.000-nik akiliisussaalluni, umiarsuaatileqatigiiffik aningaasatigut annaasaqarsimagaluarpalluunniit.

§ 21 Danmarkimi angallassinermut assartuinermullu inatsisit isumaqatigiissutillu Royal Arctic Linemi atuutsinneqarput. Suliakkiisoq Kalaallit Nunaanninngaanneersuuppat taava Nunatta Eqqartuussisuuneqarfia kisimi pisussaaffeqarpoq aaqqiagiinngissuteqarnernut angallassinermut assartuinermut allanillu sullissinerup iluaniittunut Royal Arctic Linep ingerlatarisaanut aalajangiisussaasutut. Suliakkiisoq Kalaallit Nunaata avataaneersuuppat taava Danmarkimi eqqartuussisoqarfiit, tassunga atallutik Sø- og Handelsretten i København, kisimik aalajangiisussaatitaapput.

§ 22 Containerinik attartortitsineq/atukkiussineq. Sullitaq containerimik Royal Arctic Linemit attartorsimatilluni ajoqusiippat annaasaqaateqarpalluunniit Royal Arctic Line akisussaasuunngilaq, tassunga ilaallutik nassiussat containerip iluaniittut aserorsimappata containeri sananeqaatimigut kukkuneqarsimappat amigaateqarpalluunniit (qanorluunniit piumasaqaat tunngavilersorneqaraluarpat), Royal Arctic Line nammineq pisuunngikkuni, sulisulluunniit Royal Arctic Linemi mianersugaalliornikkut aseruisimanngippata Royal Arctic Line akisussaasuunngilaq. Royal Arctic Line akisussaasuunngilaq nassiussat kukkuneqarnerinut sumiginnaanermulluunniit, tassaniilluni nioqqummut, sanaartorfimmut, piniarfigisamut, assigisaanulluunniit, nioqqutip sananeqarnerani, tuniniarneqarnerani, iluarsartuunneqarnerani containerilluunniit aserfallatsaalineqarneranut tunngassutilimmut, akisussaaffik inissinneqarsinnaappat, tassani apeqqutaanani kukkunerit taamaattut sumiginnaanermik imaluunniit mianersuaalliornermik tunngaveqaraluarpata. Royal Arctic Linep ataatsimut sullitaminut akisussaaffiata susoqaraluarpalluunniit containerimik attartornermi/atukkiussinermi ajoqusertoqarsimatillugu 15.000 kr.-it sinnissanngilaat. Ajoqusernerit suulluunniit sullitap akisussaaffigai, tassunga ilanngullugu attartornerup/atukkiussinerup nalaani containerimi tammartoqarpoq.

ASSARTUINERMUT AALAJANGERSAKKAT – NASSUIAATIT
Nassuiaatit ataani allaqqasut Royal Arctic Linep assartuinermut aalajangersagaanut ilaatinneqarput.
ASSARTUINERMUT AALAJANGERSAKKAT
Assartuinermut aalajangersakkat tassaapput Royal Arctic Linep Kalaallit Nunaannut, Kalaallit Nunaannit, Kalaallillu Nunaata iluani Namminersorlutik Oqartussat akuersissutaat naapertorlugit ingerlatsinermi, aammalu kiffartuussinissamik isumaqatigiissutit nunaqarfiliartarnerni aammalu umiarsualivinni sullissinerit iluini. Taakku saniatigut akissatut aalajangersakkat iluaniipput kiffartuussinerit sullissinerit iluini.

NASSIUSSAT SUUNERI
Nassiussat tamarmik Kalaallit Nunaata iluani avataanilu imatut immikkoortiterneqartarput:
A Usit tamalaat (LCL). Usit tamalaat tassaapput containerinik nassiussat sullitat nammineerlutik poortorsimanngisaat (FLC), soorlu nassiussat angisoorsuit imaluunnit nassiussat immikkut ittut. Usit tamalaat aamma naalisarlugu LCL-imik taaneqartarput (Less Container Load).
B Containerit sullitat namminneq poortugaat (FLC). Containerit sullitat namminneq poortugaat tassaapput nassiussat tamalaat ISO-containerinik FLC-imilluunniit assigisaannik nassiunneqartut (ataani nassuiarneqartutut angallassinermi atortut/FLC-it atortuisa ataanni), nassiussisumit nammineq immerneqartoq, tigusisumillu imaarneqartussaq. Containerit sullitat namminneq poortorlugit nassiussaat FLC-imik taaneqartarput. (Full Container Load).
C Nassiussat angisoorsuit. Nassiussat angisoorsuit tassaapput nassiussat portussutsimut, silissutsimut takissutsimullu nassiussanut akigititat allattorsimaffianni matumani anginerusut tamarmik.
D Nassiussat immikkut ittut. Nassiussat immikkut ittut tassaapput nassiussat akigititanik aalajangersakkani nassuiaasersorneqartut.
E Nassiussat suussusaat. Kalaallit Nunaata iluani avataanilu nassiussat tamarmik suussutsinut agguataarneqartarput:
Nassiussat suussusaat
• Nassiussat nalinginnaasut
• Nassiussat kissassutsimi/nillissutsimi aalajangersimasumiittussat
• Usit navianartut kissassutsimi/nillissutsimi aalajangersimasumiittussat
• Usit navianartut
• Igitassat nassiussat
• Nassiussat allequtsikkat
• Qamutit angallatillu
• Assartuinermut atortut

F Sullitat namminneq containerit immigaat (FCL)
Nassiussat suussusaat
• Nassiussat nalinginnaasut
• Nassiussat kissassutsimi/nillissutsimi aalajangersimasumiittussat
• Usit navianartut
• Igitassat nassiussat
• Nassiussat allequtsikkat
• Assartuinermut atortut
G Allat
Nassiussat suussusaat
• Nassiussat angisoorsuit
• Nassiussat immikkut ittut

ASSARTUINERMUT ATORTUT KALAALLIT NUNAANNI ANGALLANNERMI ASSARTUINERMUT ATORTUT TASSAAPPUT:
H LCL-atortut. LCL-atortut tassaapput
• ”shipper’s own” containerit, flatrackit, collapsible flatrackit, flatbedsit, aamma tankcontainerit, FCL-atortorissaarutit pillugit ataani nassuiarneqartunik naammassinninngitsut
• RAL- aamma EUR-palletsit imaluunniit atortut taakkununnga assersuunneqarsinnaasut
I FCL-atortut. FCL-atortut tassaapput
• Royal Arctic Linep MC-containerii
• Royal Arctic Linep kiisalu ”shipper’s own” 20’ aamma 40’ ISO-containerii (nalinginnaasut kiisalu kissassutsimut/nillissutsimut nakkutigalugit nassiussat), flatracksit, collapsible flatracksit aamma tankcontainerit. FCL-atortorissaarutit www.ral.gl-imi containerinut nassiussaatini allaaserineqarput.
J Sumiiffiit akigititaqarfiit. Akigititaqarfiit tassaapput illoqarfiit nunaqarfiillu Royal Arctic Linep ingerlavigisartagaanut nalunaarsorsimaffimmiittut www.ral.gl-kkut takuneqarsinnaasumi. Akigitinneqartuni ataasiakkaani nassiussalerinermut akit assigiiaarput.
K Sumiiffiit ingerlaarfiit. Royal Arctic Linep nalinginnaasumik ingerlaarfii tassaapput illoqarfiit nunaqarfiillu Danmarkimiittut, Islandimiittut Kalaallit Nunaanniittullu, nalunaarsorsimaffimmi www.ral.gl-ikkut takuneqarsinnaasumi, taakkulu saniatigut aamma Kalaallit Nunaanni tikitassanut sanaartorfiusunut uuliasiortunut aatsitassarsiortunulluunniit assigisaannullu pajunneq suliassaqarfiit ilagivaat.
L Sullitat namminneq poortugaannik containerinik (FLC) attartorneq. Sullitat namminneq immigaannik containerinik nassiussinermi containerinik atorneq akiligassanngussaaq inniminniinermi uppernarsaammi nassiussinermiluunniit allagartami ulluliunneqartut qaangerneqarpata.
M Inissaqartitsinermut akiliut sullitat namminneq immigaannut containerinut (LCL). Inissaqartitsinermut akiliut…